உங்க பணத்துக்கு ஆபத்து... வங்கி வாடிக்கையாளர்கள் எச்சரிக்கை!

தொழில்நுட்ப அம்சங்கள் அதிகரித்து வருவதைப் போலவே அதன் மூலம் மோசடிகளும் அதிகரித்து வருகின்றன. குறிப்பாக, வங்கிச் சேவையில் இது தொடர்பான மோசடிகள் ஏராளம். வங்கிகள் தரப்பிலிருந்து வாடிக்கையாளர்களுக்கு தொடர்ந்து விழிப்புணர்வு மற்றும் எச்சரிக்கை விடுக்கப்பட்டு வந்தாலும் மோசடிகள் தொடர்ந்து கொண்டுதான் இருக்கின்றன.

வாடிக்கையாளர்களின் மொபைல் எண்ணுக்கு போன் செய்து அவர்களது தனிநபர் மற்றும் வங்கிக் கணக்கு விவரங்களைக் கேட்டு, பணத்தை எடுக்கும் மோசடி தொடர்கிறது. அதேபோல, வங்கியில் இருந்து அழைப்பதாகக் கூறி நம்மிடம் வங்கிக் கணக்கு விவரங்களையும் ஓடிபி எண், PIN நம்பரை திருடும் மோசடிகள் அதிகரித்துள்ளன. இதனால் நமக்குத் தெரியாமலே வங்கிக் கணக்கிலிருந்து பணம் திருடப்படுகிறது. ஏடிஎம் எந்திரங்களில் நமது PIN நம்பரைத் திருடி பணத்தை எடுப்பதும், ஏடிஎம் கொள்ளைகளும் தொடர்ந்துகொண்டிருக்கின்றன.

மாதம் ரூ.5,000 பென்சன்... எத்தனை வயதில் எவ்வளவு கட்டணும்?

இதுகுறித்து வங்கிகள் தரப்பிலிருந்து தொடர்ந்து எச்சரிக்கப்பட்டு வந்தாலும் இந்த மோசடிகள் குறைந்தபாடில்லை. இந்நிலையில், இந்தியாவின் மிகப் பெரிய பொதுத் துறை வங்கியான ஸ்டேட் பேங்க் ஆஃப் இந்தியா தனது வாடிக்கையாளர்களுக்கு மீண்டும் ஒரு முறை எச்சரிக்கை செய்துள்ளது. ஆன்லைன் மூலமாக தனிநபர் விவரங்களை யாரிடமும் பகிரவேண்டாம் எனவும், ஆன்லைனில் வரும் தேவையில்லாத மொபைல் செயலிகளைப் பதிவிறக்கம் செய்து ஏமாற வேண்டாம் எனவும் கேட்டுக் கொண்டுள்ளது.

வாடிக்கையாளர்களின் பிறந்த தேதி, டெபிட் கார்டு நம்பர், இண்டர்நெட் பேங்கிங் ஐடி மற்றும் பாஸ்வர்டு, டெபிட் கார்டு PIN நம்பர், CVV நம்பர், OTP போன்றவற்றை யாரிடமும் கொடுக்க வேண்டாம் என்று வங்கி வாடிக்கையாளர்களை ஸ்டேட் பேங்க் ஆஃப் இந்தியா எச்சரிக்கை செய்துள்ளது. அதேபோல, ஸ்டேட் பேங்க் ஆஃப் இந்தியா வங்கி அதிகாரி, போலீஸ், அரசு அதிகாரி போன்றவர்கள் போல சித்தரித்துக்கொண்டு வாடிக்கையாளர்களுக்கு போன் செய்து மேற்கூறிய விவரங்களைக் கேட்டால் கொடுக்கக் கூடாது என்று அறிவுறுத்தியுள்ளது. தேவையற்ற மூலங்களில் இருந்து ஈமெயிலுக்கு வரும் லிங்க் போன்றவற்றை கிளிக் செய்ய வேண்டாம் எனவும் இவ்வங்கி விழிப்புணர்வு செய்துள்ளது.