செல்வ மகள் சேமிப்புத் திட்டத்தில் இவ்வளவு பயன் இருக்கா?

பெண் குழந்தைகளின் எதிர்கால நலனுக்காக 'சுகன்யா சம்ரிதி யோஜனா' எனப்படும் செல்வ மகள் சேமிப்பு திட்டத்தை இந்திய தபால் துறை செயல்படுத்தி வருகிறது. பிறந்த குழந்தை முதல் 10 வயதிற்கு உட்பட்ட பெண் குழந்தைகளின் பெயரில் அவர்களது பெற்றோரோ அல்லது பாதுகாவலரோ தபால் அலுவலகங்களில் கணக்கு திறக்கலாம். இதில், செலுத்தும் தொகைக்கு வரி விலக்கு அளிக்கப்படுகிறது. இத்திட்டத்தின் கீழ், அதிகபட்சமாக இரண்டு குழந்தைகளுக்காக இரண்டு கணக்குகளைத் திறக்க முடியும்.

செல்வ மகள் சேமிப்புத் திட்டத்தில் ஆண்டுக்கு 7.6 சதவீத வட்டி வழங்கப்படுகிறது. சிறு சேமிப்புத் திட்டத்திலேயே செல்வ மகள் சேமிப்புத் திட்டத்தில்தான் அதிக வட்டி கிடைக்கிறது. 21 வயதில் கணக்கை முடிக்கும் போது மூன்று மடங்கு தொகை கிடைப்பதால் பொதுமக்களிடையே இத்திட்டம் அதிக வரவேற்பைப் பெற்றுள்ளது. பெண்ணுக்கு 24 வயது ஆகும் போதோ அல்லது திருமணத்தின் போதோ கணக்கிலுள்ள மொத்தத் தொகையை எடுத்துவிட்டு கணக்கை மூடி விடலாம். செல்வ மகள் சேமிப்புக் கணக்கை துவக்கும் போது முதல் கட்டமாக ரூ.250 செலுத்தினால் போதுமானது. வருமான வரிச் சட்டம் 80 சி-இன் கீழ் வரி விலக்கு கிடைக்கிறது.

செல்வ மகள் சேமிப்புத் திட்டத்தில் பெண் குழந்தைகளைச் சேர்க்க அவர்களின் பிறப்புச் சான்றிதழைச் சமர்ப்பிக்க வேண்டும். பிறப்புச் சான்றிதழ் இல்லாத நிலையில், ஆதார் கார்டு, பான் கார்டு மற்றும் பாஸ்போர்ட் போன்றவற்றை வயதுச் சான்று ஆவணமாக வழங்கலாம். இந்தத் திட்டத்தை தொடங்க அருகிலுள்ள தபால் நிலையத்தை அணுகலாம். பெற்றோரின் ஆதார் அட்டை மற்றும் குழந்தையின் ஆதார் அட்டை அல்லது பிறப்புச் சான்றிதழ் நகலைக் காண்பித்து கணக்கை எளிதாகத் தொடங்க முடியும். செல்வ மகள் திட்டத்தின் படிவத்தை நிரப்பி தேவையான ஆவணங்களுடன் புகைப்படத்தை சேர்த்து சமர்ப்பிக்க வேண்டும்.

செல்வ மகள் சேமிப்புத் திட்டத்தின் கீழ் ஒவ்வொரு மாதமும் ரூ.1,000 சேமித்து வந்தால் இத்திட்டத்தின் முடிவில் மொத்தம் ரூ.1.80 லட்சம் டெபாசிட் செய்யப்பட்டிருக்கும். அதற்கு வட்டியாக ரூ.3.29 லட்சம் கிடைக்கும். மொத்தமாகப் பார்த்தால் ரூ.5.09 லட்சம் லாபம். ஒருவேளை ஒவ்வொரு மாதமும் ரூ.12,500 சேமித்து வந்தால் மொத்தம் உங்களுக்கு ரூ.63.65 லட்சம் கிடைக்கும். இதில் டெபாசிட் பணம் ரூ.22.50 லட்சம் மற்றும் வட்டிப் பணம் ரூ.41.15 லட்சம். அதேபோல, ரூ.10,000 சேமித்தால் ரூ.51 லட்சமும், ரூ.9,000 சேமித்தால் ரூ.46 லட்சமும், ரூ.8,000 சேமித்தால் ரூ.40 லட்சமும், ரூ.7,000 சேமித்தால் ரூ.35 லட்சமும், ரூ.6,000 சேமித்தால் ரூ.30 லட்சமும், ரூ.5,000 சேமித்தால் ரூ.25 லட்சமும் கிடைக்கும்.