பாலியல் தொழிலும் ஒரு தொழில்தான்.. அவங்களுக்கு மரியாதை கொடுங்க.. உச்ச நீதிமன்றம் உத்தரவு!

பாலியல் தொழிலும் ஒரு தொழில்தான் எனவும், பாலியல் தொழிலாளர்களிடம் பாகுபாடு காட்டவோ அவர்களை துன்புறுத்தவோ கூடாது என உச்ச நீதிமன்றம் மிக முக்கியமான உத்தரவை இன்று பிறப்பித்துள்ளது.

நீதிபதி நாகேஸ்வர ராவ் தலைமையிலான அமர்வு இன்று பிறப்பித்த உத்தரவில் பாலியல் தொழிலாளர்கள் நலன் சார்ந்த முக்கியமான வழிகாட்டல்கள் வெளியாகியுள்ளன. குறிப்பாக, பாலியல் தொழில் செய்வதால் ஒருவரை துன்புறுத்தக்கூடாது என உச்ச நீதிமன்றம் தெளிவுபடுத்தியுள்ளது.

பாலியல் தொழிலும் ஒரு தொழில்தான், எனவே பாலியல் தொழிலாளர்களுக்கு சட்டப்படி பாதுகாப்பும், மரியாதையும் வழங்கப்பட வேண்டும். வயது மற்றும் சம்பந்தப்பட்டவர்களின் விருப்பத்துக்கு ஏற்ப கிரிமினம் சட்டம் சமமாக பயன்படுத்தப்பட வேண்டும் எனவும் உச்ச நீதிமன்றம் உத்தரவிட்டுள்ளது.

பொதுத்துறை வங்கிகள் தனியார்மயம்.. வேலையை தொடங்கிய மத்திய அரசு!
ஒரு பாலியல் தொழிலாளி சொந்த விருப்பத்துடன் பாலியல் தொழில் செய்யும்போது அவர் மீது காவல்துறையினர் கிரிமினல் நடவடிக்கை எடுக்கக்கூடாது. அவரவர் தொழில் சாராமல் அனைவருக்கும் சமமான மரியாதை வழங்கப்பட வேண்டும் என அரசியல் சாசனம் கூறுவதையும் உச்ச நீதிமன்றம் சுட்டிக்காட்டியுள்ளது.

பாலியல் தொழில் விடுதிகளை நடத்துவது மட்டுமே சட்டத்துக்கு எதிரானது என்பதால், பாலியல் விடுதிகளில் தங்கியிருக்கும் பாலியல் தொழிலாளர்களை கைது செய்யவோ, தண்டிக்கவ, துன்புறுத்தவோ கூடாது என உச்ச நீதிமன்றம் உத்தரவிட்டுள்ளது.

மேலும், ஒரு பாலியல் தொழிலாளி பாலியல் தொழில் செய்வதாலேயே அவரின் குழந்தையை அவரிடம் இருந்து பிரித்துவிடக்கூடாது. பாலியல் தொழிலாளர்களுக்கும் அவர்களது குடும்பங்களுக்கும் அடிப்படை பாதுகாப்பு மற்றும் மரியாதை வழங்கப்பட வேண்டும் என உச்ச நீதிமன்றம் தெரிவித்துள்ளது.

பாலியல் தொழிலாளர்களுக்கு எதிராக காவல்துறையினர் பாகுபாடு காட்டக்கூடாது எனவும், புகார் அளிக்க வரும் பாலியல் தொழிலாளர்களை சமமாக நடத்த வேண்டும் எனவும், பாலியல் வன்முறையால் பாதிக்கப்பட்ட பாலியல் தொழிலாளர்களுக்கு பாதுகாப்பு, மருத்துவ மற்றும் சட்ட உதவிகள் வழங்கப்பட வேண்டும் எனவும் உச்ச நீதிமன்றம் தெரிவித்துள்ளது.