பழைய பென்சன் திட்டம்: வாழ்க்கையே இருளாகிவிட்டது.. ஒளி தருவாரா தமிழக முதல்வர்?

தமிழ்நாட்டில் தற்போது நடைமுறையில் இருக்கும் பங்களிப்பு ஓய்வூதியத் திட்டத்தில் (சிபிஎஸ்) நன்மை ஒன்றும் இல்லை எனவும், மீண்டும் பழைய பென்சன் திட்டத்தை அமல்படுத்த வேண்டும் எனவும் எனவும் தமிழக அரசு ஊழியர்கள் போராடி வருகின்றனர்.

பங்களிப்பு ஓய்வூதியத் திட்டத்தை ஒழித்துவிட்டு, பழைய பென்சன் திட்டத்தை அமல்படுத்த வேண்டும் என்பதையே குறிக்கோளாகக் கொண்டு சிபிஎஸ் ஒழிப்பு இயக்கம் என்ற பெயரில் பல்வேறு மாவட்ட அரசு ஊழியர்கள் ஒன்றாக இணைந்து போராடி வருகின்றனர்.

பழைய பென்சன் திட்டத்தை அமல்படுத்தும் போராட்டத்தில் தமிழக அரசு ஊழியர்கள் மார்ச் 9ஆம் தேதி தங்களுடைய கண்களில் கருப்புத் துணி கட்டு போராட்டம் செய்ய தீர்மானம் எடுத்தனர்.

சிபிஎஸ் ஒழிப்பு இயக்கத்தின் மாநில மைய முடிவின்படி இன்று (மார்ச் 9) கண்களில் கருப்புத் துணி கட்டி சேலம் மாவட்டம் ஆத்தூர் வட்டம் ஏத்தாப்பூர் அரசு ஆரம்ப சுகாதார நிலையத்தின் முன்பு போராட்டம் செய்தனர்.

கன்னங்குறிச்சியில் சிபிஎஸ் ஒழிப்பு இயக்கம் சார்பில் தமிழக அரசு ஊழியர்கள் கண்களில் கருப்பு துணி கட்டி ஆர்ப்பாட்டம் செய்தனர். இதில் நிறையப் பேர் கலந்து கொண்டனர்.

தமிழகத்தின் பல்வேறு இடங்களில் பல்வேறு துறை சார்ந்த அரசு ஊழியர்கள் கண்களில் கருப்புத் துணி கட்டு போராடி வருகின்றனர். பழைய பென்சன் திட்டத்தை அமல்படுத்தும் வரை அயராது போராடுவோம் என்று அவர்கள் தெரிவித்துள்ளனர்.