தொழில்புரிய சிறந்த மாநிலம்.. மாஸ் காட்டும் தமிழ்நாடு!

மத்திய அரசின் தொழில் மற்றும் உள்நாட்டு வர்த்தக ஊக்குவிப்புத் துறை பல்வேறு காரணிகளின் அடிப்படையில் வணிகம் புரிதலை எளிதாக்குதல் (Ease of Doing Business) தொடர்பாக அனைத்து மாநிலங்களையும், யூனியன் பிரதேசங்களையும் தர வரிசைப்படுத்தும் நடைமுறையை பல வருடங்களாக மேற்கொண்டு வருகிறது.

இந்த நடைமுறையில், மாநிலங்கள்
1) சிறந்த சாதனையாளர்கள் (Top Achievers),
2) சாதனையாளர்கள் (Achievers),
3) சாதனை படைக்க முயற்சிப்பவர்கள் (Aspirers)
4) வணிக சூழலை உருவாக்கி வருபவர்கள் (Emerging Business Ecosystems)

ஆகிய நான்கு பிரிவுகளாக வகைப்படுத்தப்படுகின்றன.

90 சதவிகிதத்திற்கும் மேலாக மதிப்பெண்கள் பெறும் மாநிலங்கள் சிறந்த சாதனையாளர்கள் பட்டியலில் இடம் பெறும். அந்த வகையில், தமிழ்நாடு, 31 மாநிலங்கள் மற்றும் யூனியன் பிரதேசங்கள் அடங்கிய இந்த தரவரிசைப் பட்டியலில், 96.97 சதவிகித மதிப்பெண்கள் பெற்று, மூன்றாவது இடத்தைப் பெற்றுள்ளது.

2016-17ஆம் ஆண்டில் 18வது நிலை, 2019ம் ஆண்டு 14வது நிலை என்றிருந்த தமிழ்நாடு இப்போது பெருமளவு முன்னேற்றம் கண்டு 3ஆவது நிலையைப் பெற்றுள்ளது. மத்திய அரசின் தொழில் மற்றும் உள்நாட்டு வர்த்தக ஊக்குவிப்புத் துறை பரிந்துரைத்த 301 சீர்திருத்தங்களைச் செயல்படுத்தியதற்காகவும், பயனர் கருத்துக் கணக்கெடுப்பு ஆகியவற்றைக் கருத்தில் கொண்டும் இந்த வணிகம் புரிதலை எளிதாக்கும் தரவரிசை நிர்ணயிக்கப்பட்டுள்ளது.

Ease Of Doing Business: தொழில் செய்ய சிறந்த மாநிலங்கள்.. தமிழகம் முன்னிலை!
சீர்திருத்தங்களை சிறப்பான முறையில் தமிழ்நாடு அரசு செயல்படுத்தியதால், பயனீட்டாளர்களிடமிருந்து சிறந்த கருத்துக்களை பெற முடிந்தது. எனவேதான், தரவரிசையில் சிறப்பான முன்னேற்றத்தை அடையமுடிந்தது என்று தமிழக அரசு தெரிவித்துள்ளது.