பொங்கல் போனஸ், சம்பள உயர்வு.. எதிர்பார்ப்பு நிறைவேறுமா?

பணி நிரந்தரம், சம்பள உயர்வு, பொங்கல் போனஸ், அட்வான்ஸ் தொடர்பாக பகுதி நேர ஆசிரியர்கள் கோரிக்கை.

தேர்தல் வாக்குறுதியின் அடிப்படையில் பணி நிரந்தரம், சம்பள உயர்வு, போனஸ் உள்ளிட்ட கோரிக்கைகளை முன்வைத்து 12ஆயிரம் பகுதி நேர ஆசிரியர்கள் எதிர்பார்ப்புடன் காத்திருக்கின்றனர்.

அரசுப் பள்ளிகளில் ஆறு முதல் எட்டாம் வகுப்பு வரை படிக்கும் மாணவர்களுக்கு, உடற்கல்வி, ஓவியம், கணினி, தையல், இசை, தோட்டக்கலை, கட்டிடக்கலை, வாழ்வியல் திறன் பாடங்களை சுமார் 12ஆயிரம் பகுதி நேர ஆசிரியர்கள் கடந்த 10 ஆண்டுக்கு மேலாக கற்று கொடுக்கின்றனர்.

பென்சன் மோசடி.. ஓய்வூதியதாரர்கள் இதை செய்யக்கூடாது!
அவர்களுக்கு 10 ஆயிரம் ரூபாய் தொகுப்பூதியம் வழங்கப்படுகிறது. 2021ஆம் ஆண்டில் திமுக ஆட்சிக்கு வந்தது. திமுக தேர்தல் அறிக்கையில், ஆட்சிக்கு வந்தால் பகுதிநேர ஆசிரியர்கள் பணி நிரந்தரம் செய்யப்படுவார்கள் என வாக்குறுதி அளித்திருந்தது.

எனினும், 19 மாதங்கள் ஆகியும் பகுதி நேர ஆசிரியர்கள் இன்னும் பணி நிரந்தரம் செய்யப்படாததால் அவர்கள் பணி நிரந்தரம் செய்யப்பட வேண்டும் என தொடர்ந்து வலியுறுத்தி வருகின்றனர்.

தற்போது பொங்கல் பண்டிகையும் நெருங்கி வரும் சூழலில் பணி நிரந்தரம் செய்யப்படுவதோடு பொங்கல் போனஸ், சம்பள உயர்வு உள்ளிட்ட சலுகைகளையும் வழங்க வேண்டும் என தமிழ்நாடு அரசுக்கு பகுதிநேர ஆசிரியர்கள் வலியுறுத்தியுள்ளனர்.

இதுகுறித்து பகுதிநேர ஆசிரியர்கள் கூட்டமைப்பு ஒருங்கிணைப்பாளர் செந்தில்குமார், “திமுக ஆட்சிக்கு வந்தால், பகுதி நேர ஆசிரியர்கள் பணி நிரந்தரம் செய்யப்படுவார்கள் என தேர்தல் வாக்குறுதி அளிக்கப்பட்டது. ஆட்சி அமைந்து 19 மாதங்கள் ஆகிவிட்டது.

இன்னும் பணி நிரந்தரம், சம்பள உயர்வு வழங்கப்படவில்லை. பொங்கல் போனஸ், அட்வான்ஸ் இந்த ஆண்டாவது வழங்க வேண்டும். அமைச்சரவையில் முதல்வரின் முடிவை எதிர்நோக்கி உள்ளோம்” என்று தெரிவித்துள்ளார்.