Air India: புதுசா 500 விமானங்கள்.. 100 பில்லியன் செலவு.. ஏர் இந்தியாவின் தடாலடி ஆர்டர்!

ஏர் இந்தியா நிறுவனத்தை டாடா குழுமம் வாங்கியதில் இருந்தே, ஏர் இந்தியாவை உலகத்தரம் வாய்ந்த ஏர்லைன் நிறுவனமாக மாற்றுவதற்கு பல்வேறு நடவடிக்கைகளை மேற்கொண்டு வருகிறது. விமானத்தில் உணவு மெனு மாற்றியது முதல் புதிய விமானங்களை வாங்குவது வரை ஏர் இந்தியாவில் பல மாற்றங்கள் ஏற்பட்டுள்ளன.

இந்நிலையில், ஒரே ஆர்டரில் 500 புதிய விமானங்களை ஏர் இந்தியா நிறுவனம் விலைக்கு வாங்கப்போவதாக ராய்ட்டர்ஸ் ஊடகம் தகவல் வெளியிட்டுள்ளது. இந்த 500 புதிய விமானங்களின் விலை சுமார் 100 பில்லியன் டாலர் என்று கூறப்படுகிறது.

இதுகுறித்து ராய்ட்டர்ஸ் ஊடகம் வெளியிட்டுள்ள தகவல்படி, ஏர் இந்தியா நிறுவனம் புதிதாக 250 ஏர்பஸ் விமானங்களையும், 220 போயிங் விமானங்களையும் வாங்குவதற்கு ஆர்டர் கொடுத்துள்ளதாக தெரிகிறது.

இதன்படி, ஏர்பஸ் நிறுவனத்திடம் இருந்து 210 A320neos ரக விமானங்களையும், 40 A350s ரக விமானங்களையும் ஏர் இந்தியா நிறுவனம் வாங்கப்போகிறது. இதுபோக போயிங் நிறுவனத்திடம் இருந்து 190 737 MAX ரக ஜெட் விமானங்கள், 20 787 ரக விமானங்கள், 10 777Xs விமானங்கள் ஆகியவற்றையும் ஏர் இந்தியா நிறுவனம் வாங்கப்போகிறது.

புதிய விமானங்களை வாங்குவதற்கு ஏர் இந்தியா நிறுவனத்துக்கும், ஏர்பஸ் நிறுவனத்துக்கும் இடையே பிப்ரவரி 10ஆம் தேதி ஒப்பந்தம் கையெழுத்தாகியுள்ளதாக தகவல் வெளியாகியுள்ளது. அதற்கு முன் ஜனவரி 27ஆம் தேதி போயிங் நிறுவனமும் ஏர் இந்தியாவின் ஆர்டரை ஏற்றுக்கொண்டுள்ளது.

இந்த இரண்டு ஆர்டர்கள் குறித்த அதிகாரப்பூர்வ தகவல் விரைவில் வெளியாகும் எனவும் கூறப்படுகிறது. இந்த இரு ஆர்டர்களும் உறுதிசெய்யப்பட்டால் வரலாற்றில் ஒரே ஒரு ஏர்லைன் நிறுவனம் கொடுத்த மிகப்பெரிய ஆர்டர் இதுவே எனவும் ராய்ட்டர்ஸ் கூறுகிறது.