டாடா கார் விலை உயர்வு.. இந்த தேதிக்குள் வாங்கிவிட்டால் கம்மிதான்!

முன்னணி கார் நிறுவனமான டாடா மோட்டார்ஸ் வரும் மே 1ஆம் தேதி முதல் கார்களின் விலை உயர்த்தப்படும் என்று தெரிவித்துள்ளது. இந்த அறிவிப்பு டாடா கார் வாங்க திட்டமிட்டிருப்பவர்களுக்கு அதிர்ச்சி அளிக்கும் வகையில் வெளியாகியுள்ளது.

கார்களுக்கான உற்பத்தி செலவு தொடர்ந்து உயர்ந்து வருகிறது. மேலும், கார்களுக்கு புதிய ஒழுங்குமுறை விதிகளும் அமலுக்கு வந்துள்ளன. இதனால், உற்பத்தி செலவை சமாளிக்க முடியாமல் கார் நிறுவனங்கள் அவதிப்பட்டு வருகின்றன.

எனவே, உற்பத்தி செலவுகளை எதிர்கொள்வதற்காக கார் விலையை உயர்த்துவதற்கு டாடா மோட்டார்ஸ் நிறுவனம் முடிவு செய்துள்ளது. இதன்படி, வரும் மே 1ஆம் தேதி முதல் கார்களின் விலை 0.6% உயர்த்தப்படும் என டாடா மோட்டார்ஸ் நிறுவனம் தெரிவித்துள்ளது.

இந்த லேசான விலை உயர்வு வாயிலாக உற்பத்தி செலவுகளை சமாளிப்பதுடன் மக்களுக்கு குறைந்த விலையில் தரமான கார்களை விற்பனை செய்ய முடியும் என டாடா மோட்டார்ஸ் கருதுகிறது. கார் மாடலுக்கு ஏற்ப விலை உயர்வு மாறுபடும்.

நடப்பு ஆண்டில் மட்டும் இத்துடன் மூன்றாவது முறையாக டாடா மோட்டார்ஸ் நிறுவனம் கார் விலையை உயர்த்தியுள்ளது. இதற்கு முன் பிப்ரவரி 1ஆம் தேதி முதல் கார் விலையை உயர்த்தியது. பின்னர் ஏப்ரல் 1ஆம் தேதி முதல் கார் விலையை உயர்த்தியது.

தற்போது மே 1ஆம் தேதி முதல் கார் விலை மீண்டும் உயர்த்தப்படும் என்று டாடா மோட்டார்ஸ் நிறுவனம் தெரிவித்துள்ளது. எனவே, கார் வாங்க திட்டமிட்டிருப்பவர்கள் மே 1ஆம் தேதிக்குள் வாங்கிவிட்டால் கூடுதல் செலவை தவிர்க்கலாம்.

டாடா மோட்டார்ஸ் மட்டுமல்லாமல் மாருதி சுசுகி (Maruti Suzuki), ஹுண்டாய் (Hyundai), ஹோண்டா (Honda) ஆகிய முன்னணி கார் நிறுவனங்களும் கார் விலையை உயர்த்த முடிவு செய்திருப்பது குறிப்பிடத்தக்கது.