ஐடி நிறுவனங்களுக்கு கஷ்ட காலம்.. டிசிஎஸ், இன்ஃபோசிஸ் முடிவுகளில் சிக்னல்!

டிசிஎஸ் (TCS), இன்ஃபோசிஸ் (Infosys) ஆகிய முன்னணி நிறுவனங்களின் காலாண்டு முடிவுகள் திருப்திகரமாக இல்லாத சூழலில், அடுத்து வரும் இரண்டு காலாண்டுகளுக்கு ஐடி நிறுவனங்கள் மந்தமான சூழலை எதிர்கொள்வார்கள் என எதிர்பார்க்கப்படுகிறது.

இந்தியாவின் இரண்டு மிகப்பெரிய ஐடி நிறுவனங்களான டிசிஎஸ் மற்றும் இன்ஃபோசிஸ் கடந்த வாரம் மார்ச் காலாண்டு முடிவுகளை வெளியிட்டன. அதன்படி டிசிஎஸ் நிறுவனத்தின் லாபம் 14.8% உயர்ந்துள்ளது. இன்ஃபோசிஸ் நிறுவனத்தின் லாபம் 7.8% உயர்ந்துள்ளது.

டிசிஎஸ், இன்ஃபோசிஸ் நிறுவனங்களின் லாபம் எதிர்பார்ப்புக்கு ஏற்ப இல்லாததால் கடந்த வாரம் டிசிஎஸ், இன்ஃபோசிஸ் பங்குகள் சரிந்துவிட்டன. மேலும் புரோக்கரேஜ் நிறுவனங்களும் இன்ஃபோசிஸ் நிறுவனத்துக்கான ரேட்டிங்கை குறைத்துள்ளன.

ஏற்கெனவே பொருளாதார மந்தநிலை ஏற்படும் என்ற அச்ச நிலை உருவாகியுள்ளது. இதற்கு ஏற்ப அமெரிக்க, ஐரோப்பிய நிறுவனங்களும் செலவுகளை குறைத்துள்ளன. தற்போது இதை உறுதிப்படுத்தும் வகையில் ஐடி நிறுவனங்களின் லாபம் குறைந்துள்ளது.

இனி விப்ரோ, டெக் மஹிந்திரா, எச்சிஎல் போன்ற ஐடி நிறுவனங்களின் காலாண்டு முடிவுகள் வர இருக்கின்றன. அதை வைத்தே பொருளாதார சூழல் எப்படி இருக்கிறது என்பதை புரிந்துகொள்ள முடியும் என நிபுணர்கள் கூறுகின்றனர்.

அடுத்து வரும் இரண்டு காலாண்டுகளுக்கு ஐடி நிறுவனங்கள் கடினமான சூழலையே எதிர்கொள்ள வேண்டியிருக்கும் என எதிர்பார்க்கப்படுகிறது. இரண்டு காலாண்டுகளுக்கு பிறகு நிலைமை சீராகும் எனவும் நிபுணர்கள் எதிர்பார்க்கின்றனர்.

அமெரிக்காவில் பல்வேறு நிறுவனங்கள் செலவுகளை குறைத்து வருகின்றன. ஐரோப்பாவிலோ நிறுவனங்கள் டீல் குறித்து முடிவெடுக்காமல் தாமதித்து வருவதாக ஐடி நிறுவனங்கள் தரப்பில் கூறப்படுகிறது. இதனால், அடுத்து சில காலாண்டுகளுக்கு ஐடி நிறுவனங்கள் நெருக்கடியான சூழலை சந்திக்க நேரிடும் என தெரிகிறது.