சாட் ஜிபிடிக்கு போட்டியாக குதித்த டிசிஎஸ்.. இந்தியாவின் முதல் ஏஐ சாட்போட்!

சாட் ஜிபிடியை (ChatGPT) போலவே டிசிஎஸ் (TCS) நிறுவனம் சொந்தமாக ஏஐ சாட்போட் உருவாக்கி வருவதாக தகவல் வெளியாகியுள்ளது.

மைக்ரோசாப்ட் நிறுவனத்தின் ஆதரவுடன் இயங்கி வரும் OpenAI நிறுவனம் 2022ஆம் ஆண்டு நவம்பர் மாதம் சாட் ஜிபிடி என்ற ஏஐ சாட்போட்டை (AI Chatbot) அறிமுகப்படுத்தியது. கேள்விகளுக்கு பதில் அளிப்பது, கட்டுரை எழுதுவது, சாப்ட்வேர் கோடிங் செய்வது, கல்வி சார்ந்த விளக்கங்கள் அளிப்பது என சாட் ஜிபிடி பல்வேறு வேலைகளை நொடிகளில் செய்து முடிக்கிறது.

ஏஐ எனப்படும் செயற்கை நுண்ணறிவு தொழில்நுட்பத்தில் சாட் ஜிபிடி இயங்குகிறது. ஏஐ துறையில் சாட் ஜிபிடி ஒரு மைல்கல்லாக கருதப்படுகிறது. எனவே, சாட் ஜிபிடிக்கு போட்டியாக பல்வேறு நிறுவனங்கள் சொந்தமாக ஏஐ சாட்போட் உருவாக்கி வருகின்றன.

குறிப்பாக கூகுள் நிறுவனம் சாட் ஜிபிடிக்கு போட்டியாக பார்டு (Bard) என்ற ஏஐ சாட்போட்டை உருவாக்கியுள்ளது. இதேபோல அமேசான் நிறுவனமும் சாட் ஜிபிடிக்கு போட்டியாக சொந்தமாக ஒரு ஏஐ சாட்போட் உருவாக்கி வருகிறது.

மறுபக்கம் சீன நிறுவனங்களும் மும்முரமாக சாட் ஜிபிடிக்கு போட்டியாக சொந்த ஏஐ சாட்போட் உருவாக்கி வருகின்றன. குறிப்பாக அலிபாபா நிறுவனம் Tongyi Qianwen என்ற ஏஐ சாட்போட்டை உருவாக்கியுள்ளது. மேலும் பெய்டு நிறுவனம் Ernie என்ற ஏஐ சாட்போட்டை உருவாக்கியுள்ளது.

இந்நிலையில், இந்தியாவும் ஏஐ சாட்போட் போட்டியில் களமிறங்கியுள்ளது. இந்தியா தரப்பில் டிசிஎஸ் (TCS) நிறுவனம் சொந்தமாக ஏஐ சாட்போட் உருவாக்கி வருவதாக தகவல் வெளியாகியுள்ளது.

இதுகுறித்து டிசிஎஸ் நிறுவனத்தின் தலைமை செயல் அதிகாரி (COO) கணபதி சுப்ரமணியம் ET ஊடகத்திடம் பேசியபோது, டிசிஎஸ் நிறுவனமும் ஏஐ சாட்போட் உருவாக்கி வருவதாக தெரிவித்துள்ளார். இதனால் டிசிஎஸ் நிறுவனத்தில் ஏஐ துறை சார்ந்த Prompt Engineer வேலைவாய்ப்புகள் உருவாகும் எனவும் அவர் தெரிவித்துள்ளார்.