சீனியர் சிட்டிசன்களுக்கு இலவச விமான பயணம்!

சீனியர் சிட்டிசன்களுக்கான இலவச யாத்திரை திட்டத்தின் கீழ் கோயில் தரிசனத்துக்காக சீனியர் சிட்டிசன்களை இலவசமாக விமானத்தில் அனுப்பி வைத்தார் மத்திய பிரதேச முதல்வர் சிவராஜ் சிங் சவுகான்.

மத்திய பிரதேச மாநிலத்தில் 2012ஆம் ஆண்டிலேயே அப்போதைய பாஜக அரசு முக்கியமந்திரி தீர்த் தர்ஷன் யோஜனா திட்டத்தை அறிமுகப்படுத்தியது. இத்திட்டத்தின் கீழ் சீனியர் சிட்டிசன்கள் இலவசமாகவே சிறப்பு ரயில்களில் கோயில் தரிசன யாத்திரைகளுக்காக அனுப்பி வைக்கப்படுவார்கள்.

இந்த திட்டத்தின் கீழ் இதுவரை மொத்தமாக சுமார் 7.82 லட்சம் சீனியர் சிட்டிசன்கள் சிறப்பு ரயில்கள் வாயிலாக பல்வேறு தலங்களுக்கு இலவசமாக பயணம் செய்துள்ளனர். இந்நிலையில், இனி இந்த திட்டத்தின் கீழ் சீனியர் சிட்டிசன்கள் விமானங்களிலும் இலவசமாக பயணம் செய்யலாம் என மத்திய பிரதேச முதல்வர் சிவராஜ் சிங் சவுகான் அறிவித்தார்.

அவ்வகையில், முதற்கட்டமாக இன்று மத்திய பிரதேச மாநிலம் போபாலில் இருந்து 32 சீனியர் சிட்டிசன்கள் உத்தரப் பிரதேச மாநிலம் பிரயாக்ராஜுக்கு இலவசமாக விமானத்தில் பயணம் மேற்கொண்டனர். இந்த 32 சீனியர் சிட்டிசன்களில் 24 பேர் ஆண்கள், 8 பேர் பெண்கள்.

இந்த 32 பேரையும் வழி அனுப்பி வைப்பதற்காக மத்திய பிரதேச முதல்வர் சிவராஜ் சிங் சவுகான் இன்று போபால் விமான நிலையத்துக்கு வந்தார். இந்த திட்டத்தை முதல்முறையாக மத்திய பிரதேச அரசுதான் அறிமுகப்படுத்தியது என்பது குறிப்பிடத்தக்கது.

முதற்கட்ட விமான பயண திட்டத்தில் வரும் ஜூலை மாதம் வரை மத்திய பிரதேச மாநிலத்தின் பல்வேறு பகுதிகளை சார்ந்த சீனியர் சிட்டிசன்கள் பல்வேறு விமான நிலையங்களில் இருந்து தொகுப்புகளாக யாத்திரைக்கு அனுப்பி வைக்கப்படுவார்கள்.