வீடு வாங்குறது ரொம்ப கஷ்டம்! தாறுமாறாக உயரும் விலை!

கொரோனா பிரச்சினை வந்த பிறகு ரியல் எஸ்டேட் துறையிலும் மந்த நிலை ஏற்பட்டது. பொதுமக்களின் வாங்கும் திறனும் குறைந்துபோனது. இதனால் வீடுகளின் விற்பனையில் பெரிய வீழ்ச்சி ஏற்பட்டது. இந்நிலையில் தற்போது இயல்பு நிலை திரும்பியுள்ளதால் மீண்டும் வீடு வாங்குவதில் வாடிக்கையாளர்கள் கவனம் செலுத்தத் தொடங்கியுள்ளனர். ஆனால் வீடு வாங்குவோருக்கு கவலை தரும் விதமாக விலைவாசி அதிகரித்துள்ளது.

தேவை உயர்வு மற்றும் மூலப்பொருட்கள், கட்டுமானச் செலவுகள் அதிகரித்துள்ளதால் வீடுகளின் விலை அதிரடியாக உயர்ந்துள்ளதாக சொத்து ஆலோசனை நிறுவனமான நைட் பிராங்க் தனது ஆய்வில் தெரிவித்துள்ளது. சென்னை உள்ளிட்ட இந்தியாவின் எட்டு முன்னணி நகரங்களில் இப்போது ரியல் எஸ்டேட் வ் துறையில் விலையேற்றம் காணப்படுகிறது.

இந்த ஆண்டின் ஜனவரி - மார்ச் காலாண்டில் மட்டும் இந்தியாவின் எட்டு முன்னணி நகரங்களில் வீடுகளின் விலை சதுர அடிக்கு சராசரியாக 7 சதவீதம் வரையில் உயர்ந்துள்ளது. அதிகபட்சமாக பெங்களூருவில் 7 சதவீத வளர்ச்சி ஏற்பட்டுள்ளது. அதைத் தொடர்ந்து புனேவில் 5 சதவீதமும், பெங்களூருவில் 4 சதவீதமும், ஹைதராபாத்தில் 1 சதவீதமும் வீடுகளின் விலை உயர்ந்துள்ளன.

சென்னையைப் பொறுத்தவரையில், 2022 ஜனவரி - மார்ச் காலாண்டில் வீடுகளின் விலை 1 சதவீதம் அதிகரித்துள்ளது. வீடு கட்டுவதற்குத் தேவையான உற்பத்திப் பொருட்களின் விலை 20 சதவீதம் முதல் 70 சதவீதம் வரையில் உயர்ந்துவிட்டதால் அதன் செலவுகளை ஈடுகட்டும் வகையில் வீடுகளின் விலை உயர்த்தப்பட்டுள்ளன. இந்த நிதியாண்டில் வீடுகளின் விலை இன்னும் உயர்ந்து 15 சதவீதம் வரையில் அதிகரிக்கும் என்று இந்த ஆய்வில் மதிப்பிடப்பட்டுள்ளது.

பிரதமர் வீட்டு வசதி திட்டம்.. கலெக்டர்களுக்கு தமிழக அரசு உத்தரவு!
வீடு கட்டுவதற்குத் தேவையான ஸ்டீல் விலை 30 சதவீதமும், சிமெண்ட் விலை 22 சதவீதமும், காப்பர் விலை 40 சதவீதமும், அலுமினியம் விலை 44 சதவீதமும் பிரண்ட் கச்சா எண்ணெய் விலை 70 சதவீதமும் அதிகரித்துள்ளது. இந்த ஆண்டில் வீடு வாங்க நினைத்தவர்கள் அதிகம் செலவிட வேண்டியிருக்கும். வீடுகளுக்கான தேவை குறைந்து உற்பத்திச் செலவுகளும் குறைந்தால்தான் வீடுகளின் விலையும் குறைய வாய்ப்பு உள்ளது.