Apple BKC: இந்தியாவில் முதல் ஆப்பிள் ஸ்டோர் திறப்பு.. மாத வாடகையே ரூ.42 லட்சம்!

ஆப்பிள் நிறுவனம் 25 ஆண்டுகளாக இந்தியாவில் தனது பொருட்களை விற்பனை செய்து வருகிறது. ஆனால், இந்தியாவில் ஆப்பிளுக்கு சொந்த ஸ்டோர் இல்லை என்பது ஆப்பிள் ரசிகர்கள் மத்தியில் ஒரு குறையாகவே இருந்து வந்தது.

இந்நிலையில், ஆப்பிள் நிறுவனம் இந்தியாவில் தனது முதல் ஸ்டோரை மும்பையில் இன்று திறந்துள்ளது. இந்த ஸ்டோர் மும்பையில் பந்த்ரா குர்லா காம்பிளக்ஸில் உள்ள ஜியோ வோர்ல்ட் ட்ரைவ் மாலில் அமைந்துள்ளது. எனவே இந்த ஸ்டோர் ஆப்பிள் பிகேசி (Apple BKC) என அழைக்கப்படுகிறது.

ஆப்பிள் ஸ்டோரை ஆப்பிள் நிறுவனத்தின் CEO டிம் குக் (Tim Cook) சரியாக காலை 11 மணிக்கு திறந்து வைத்தார். ஆப்பிள் ஸ்டோர் திறப்புக்கு முன்பாகவே ஏராளமான வாடிக்கையாளர்களும், பிரபலங்களும் ஆப்பிள் ஸ்டோர் முன்பாக வரிசையில் திரண்டனர்.

11 மணிக்கு கோலாகலமாக ஆப்பிள் ஸ்டோர் திறக்கப்பட்ட பின் வாடிக்கையாளர்கள் உள்ளே அனுமதிக்கப்பட்டனர். ஸ்டோருக்குள் டிம் குக்குடன் பலரும் செல்ஃபி எடுத்துக்கொண்டனர். இதையடுத்து ஏப்ரல் 20ஆம் தேதி டெல்லியில் சாகேத் பகுதியில் அமைந்துள்ள ஆப்பிள் சாகேத் (Apple Saket) ஸ்டோரை டிம் குக் திறந்து வைக்க இருக்கிறார்.


மும்பை ஆப்பிள் ஸ்டோரை பொறுத்தவரை 20,000 சதுர அடியில் அமைந்துள்ளது. சுமார் 20க்கு மேற்பட்ட மொழிகளை பேசக்கூடிய 100க்கும் மேற்பட்ட ஊழியர்கள் இந்த ஸ்டோரில் வேலை செய்கின்றனர்.

ஐபோன், ஐபேட், மேக், ஏர்பாட்ஸ், ஆப்பிள் வாட்ச், ஆப்பிள் டிவி, ஹெட்போன்ஸ் என பல்வேறு ஆப்பிள் தயாரிப்புகள் இந்த ஸ்டோரில் விற்பனைக்காக வைக்கப்பட்டுள்ளன.

இந்த ஸ்டோருக்காக ஆப்பிள் நிறுவனம் 11 ஆண்டுகளுக்கு ஒப்பந்தம் கையெழுத்திட்டுள்ளது. மாதம் தோறும் இந்த ஸ்டோருக்காக 42 லட்சம் ரூபாய் வாடகை செலுத்த வேண்டும். மேலும் ஸ்டோர் வருவாயில் 2% தொகையையும் செலுத்த வேண்டும். 3 ஆண்டுகளுக்கு பின் 2.5% வருவாய் பங்கை செலுத்த வேண்டும்.