இதைச் செஞ்சா செலவுகளைக் குறைக்கலாம்... சூப்பர் டிப்ஸ்!

கொரோனா ஊரடங்குக்குப் பிறகு ஆன்லைன் ஷாப்பிங் செய்வோரின் எண்ணிக்கை அதிகரித்துவிட்டது. அதுவும் கிரெடிட் கார்டு வைத்திருப்பவர்கள் அளவுக்கு அதிகமாகச் செலவிடுகின்றனர். ஆன்லைன் ஷாப்பிங், கிரெடிட் கார்டு போன்றவற்றில் தேவைக்கு அதிகமாக செலவு செய்வதால் பலர் பெரும் கடன் வலையில் சிக்கிக்கொள்கின்றனர். எனவே செலவுகளைக் கட்டுப்படுத்த ஏதேனும் வழியைத் தேர்ந்தெடுக்க வேண்டும்.

செலவுகளைக் கட்டுப்படுத்த ப்ரீபெய்டு கார்டுகள் நீண்ட காலமாகவே பயன்படுத்தப்பட்டு வருகின்றன. இவை கிரெடிட் கார்டுகளுக்கு நேரெதிரானவை. ஒரு குறிப்பிட்ட அளவு பணத்தை அதில் ஏற்றி அந்த அளவுக்குள் மட்டுமே நம்மால் செலவு செய்ய முடியும். இதை வைத்தும் ஆன்லைன் ஷாப்பிங்கும் செய்ய முடியும். சில ப்ரீபெய்டு கார்டுகளை வைத்து ஏடிஎம்மில் பணம் எடுக்கலாம். இந்த ப்ரீபெய்டு கார்டுகள் வங்கிகளுடன் இணைக்கப்படாதவை.

பணத்தைப் பாதுகாக்கவும், செலவுகளைக் குறைக்கவும் இந்த ப்ரீபெய்டு கார்டுகளை வல்லுநர்கள் பரிந்துரைக்கின்றனர். சில வங்கிகள் ஆன்லைன் மூலமாக ப்ரீபெய்டு கார்டுகளை வாங்கும் வசதியைக் கொண்டுள்ளன. வேறொரு வங்கியில் இருந்து ப்ரீபெய்டு கார்டுகளை வாங்குவதாக இருந்தாலும் கேஒய்சி ஆவணங்களைக் கொடுத்து வாங்கலாம். இந்த ப்ரீபெய்டு கார்டுகளை வாங்குவதற்கு ரூ.50 முதல் ரூ.100 வரை மட்டுமே செலவாகும். அதிகமாக செலவு செய்யும் குழந்தைகளுக்கு இந்த ப்ரீபெய்டு கார்டுகளைக் கொடுத்தால் அவர்களின் செலவுகள் கட்டுப்படுத்தப்படும்.

மொபைல் வாலட் பயன்படுத்தியும் நீங்கள் உங்களது செலவுகளைக் குறைக்க முடியும். இதில் ஆன்லைன் பரிவர்த்தனைகளையும் எளிதாக மேற்கொள்ளலாம். ப்ரீபெய்டு கார்டுகள் போலவேதான் இந்த வாலெட்களும். கேஒய்சியைப் பொறுத்து வாலெட்களில் பணத்தின் அளவு இருக்கும். மொபைல் நம்பருடன் வெரிஃபை செய்யப்பட்ட வாலெட்களில் நீங்கள் மாதத்துக்கு ரூ.10,000 வரையில் வைத்துக்கொள்ளலாம். முழு கேஒய்சியையும் முடித்தால் மாதத்துக்கு ஒரு லட்ச ரூபாய் வரையில் இதில் ஏற்றலாம்.