சென்னையில் ஜனவரி 23-24 தேதிகளில் 2-வது உலக முதலீட்டாளர்கள் மாநாடு- முன்பதிவு தொடக்கம்

சென்னையில் வரும் ஜனவரி 23 மற்றும் 24ம் தேதிகளில், இரண்டாவது உலக முதலீட்டாளர்கள் மாநாடு நடைபெறுகிறது. இதற்காக நடத்தப்படும் கண்காட்சியில் கலந்துகொள்வதற்கு முன்பதிவு செய்யும் பணி தற்போது தொடங்கியுள்ளன.

கடந்த 2015ம் ஆண்டு செப்டம்பரில், மறைந்த முதல்வர் ஜெயலலிதா தலைமையில் உலக முதலீட்டாளர்கள் மாநாடு நடைபெற்றது. அதை தொடர்ந்து தற்போது இரண்டாவது முதலீட்டாளர்கள் மாநாடு அடுத்தாண்டு ஜனவரியில் நடைபெறுகிறது.

இதுகுறித்து, தமிழக கூடுதல் தலைமைச் செயலாளர் இன்று அறிவிப்பு வெளியிட்டார். அதில், இரண்டாவது உலக முதலீட்டாளர்கள் மாநாடு 2019ம் ஆண்டு ஜனவரி 23 மற்றும் 24ம் தேதிகள் நடைபெறுவதாக தெரிவித்தார்.

இந்த மாநாட்டில், தேசியளவிலும், சர்வதேசளவிலும் இருந்து பல்வேறு நிறுவனங்கள், கூட்டமைப்புகள் மற்றும் பிற நாட்டின் தூதகரங்களை சார்ந்த அதிகாரிகள் கலந்துக்கொள்ளவுள்ளனர்.

சென்னை நந்தம்பாக்கம் வர்த்தக மையத்தில் நடைபெறும் இந்த நிகழ்வில், தொழில் முதலீட்டாளர்களின் தயாரிப்பு மற்றும் சேவைகளை விளக்கும் 250-க்கும் மேற்பட்ட பொருட்காட்சி அரங்குகள் அமைக்கப்படவுள்ளன.

புதுப்பிக்கத்தக்க எரிசக்தி, மின்னணு சாதனங்கள், மோட்டார் வாகனம், மோட்டார் வாகனத்திற்கான உதிரி பாகங்கள், உணவு பதப்படுத்துதல், விவசாய துறைக்காக வர்த்தகம் உள்ளிட்ட பல்வேறு துறைகளின் பொருட்காட்சி அரங்குகள் அமைக்கப்படுகின்றன.

இதற்கான முன்பதிவுகள் செய்யும் பணி தற்போது நடைபெற்று வருகின்றன. பொருட்காட்சியில் இடம் அமைக்க கட்டணமில்லை. இதற்காக செயல்படும் குழு பொருட்காட்சி அரங்கிற்கு விண்ணப்பித்தவர்களைத் தேர்ந்தெடுத்து அவர்களுக்கான இடத்தை வழங்கும்.

கூடுதலாக தேவைப்படும் அனைத்து விபரங்களுக்கு;

தலைவர், பொருட்காட்சிக்குழு, தமிழ்நாடு உலக முதலீட்டாளர்கள் மாநாடு 2019-மற்றும் மேலாண் இயக்குநர், தமிழ்நாடு தொழில் முன்னேற்ற நிறுவனம் (சிப்காட்) என்ற முகவரியில் தொடர்பு கொள்ளலாம்.

தொலைபேசி : 91-44-28554514 நிகரி : 91-44-28518999

மின்னஞ்சல் முகவரி : md@sipcot.com பொருட்காட்சியில் பங்கேற்பதற்காகப் பதிவு செய்ய www.tngim.com இணையதளத்தை பார்வையிடும்படியும் கேட்டுக் கொள்ளப்படுகிறார்கள்.

மேலும், முதலீட்டாளர்கள் இந்த அருமையான வணிக மற்றும் வளர்ச்சி வாய்ப்புகளைப் பயன்படுத்திக் கொள்ளலாம் என்று கூடுதல் தலைமைச் செயலர் வெளியிட்டுள்ள அறிக்கையில் குறிப்பிட்டுள்ளார்.