அழுக வைக்கும் தக்காளி.. குடும்பத் தலைவிகள் வேதனை!

சமையல் செய்வதில் தக்காளியின் பங்கு மிக முக்கியமானது. வெங்காயம், தக்காளி ஆகிய இரண்டும்தான் இல்லத்தரசிகளின் பிரதான காய்கறிகளாகும். இவற்றின் விலை உயரும் போது அவர்களுக்கு அதிக நெருக்கடி ஏற்படுகிறது. ஏற்கெனவே நிறைய பொருட்களின் விலை உயர்வு தாறுமாறாக இருக்கும் நிலையில், இப்போது தக்காளி விலையும் விண்ணை முட்டும் அளவுக்கு உயர்ந்துள்ளது.

தக்காளி உற்பத்தி செய்யும் முக்கியமான இடங்களில் கனமழை பெய்து விளைச்சல் பாதிக்கப்பட்டுள்ளது. இதனால் சந்தைக்கு வரத்து குறைந்துள்ளது. இதுமட்டுமல்லாமல், டீசல் விலையேற்றத்தால் லாஜிஸ்டிக் போக்குவரத்து செலவுகளும் அதிகரித்துள்ளன. இதனால் தக்காளி விலை எக்குத்தப்பாக உயர்ந்துள்ளது. பல்வேறு இடங்களில் ஒரு கிலோ தக்காளி விலை 80 ரூபாயைத் தாண்டியுள்ளது.

ஒரு வாரத்துக்கு முன்பு தக்காளி விலை ரூ.20 - ரூ.25 என்ற அளவில் இருந்தது. ஆனால் இப்போது அதன் விலை ரூ.70 - ரூ.80 என்ற அளவுக்கு உயர்ந்துவிட்டது. தக்காளி விலை இயல்பு நிலைக்கு வர இன்னும் சில நாட்களோ வாரமோ ஆகும் என்று வியாபாரிகள் கூறுகின்றனர்.

தொடர்ந்து குறையும் தங்கம் விலை.. ஹேப்பி மோடில் வாடிக்கையாளர்கள்!

மழை பாதிப்பு மட்டுமல்லாமல், தற்போது கோடை வெயிலின் தாக்கத்தால் சில இடங்களில் தக்காளி செடிகள் கருகி பழங்கள் விவசாய நிலங்களிலேயே வீணாகியுள்ளன. இதனால் விவசாயிகள் பெரிதும் பாதிப்படைந்துள்ளனர். விவசாயிகள் மட்டுமல்லாமல், விலை உயர்வால் பொதுமக்களும் பாதிக்கப்பட்டுள்ளனர்.

சென்னை கோயம்பேடு சந்தை நிலவரப்படி, ஒரு கிலோ தக்காளி ரூ.60 முதல் ரூ.70 வரை உள்ளது. நவின் தக்காளி விலை ரூ.70 முதல் ரூ.80 வரை இருக்கிறது. சில்லறை விற்பனையில் தக்காளி விலை 80 ரூபாய்க்கு மேல் உள்ளது.