முன்னணி நிறுவனங்களில் 7ன் சந்தை மதிப்பு ரூ.41,687 கோடி உயர்வு

கடந்த வாரத்தில், இந்திய பங்குச்சந்தைகளில் பட்டியலிடப்பட்டுள்ள முன்னணி நிறுவனங்களில், 7ன் சந்தை மதிப்பு ரூ.41,687 கோடி அதிகரித்துள்ளது.

நாட்டின் முதல் 10 நிறுவனங்களின் பட்டியலை, அவற்றின் சந்தை மதிப்போடு கணக்கிட்டு, பங்குச்சந்தைகள் கட்டுப்பாட்டு வாரியமான செபி வெளியிட்டு வருகிறது. இதன்படி, சென்ற வார பங்கு வர்த்தகத்தில், ஹெச்டிஎஃப்சி நிறுவனம், ஐடிசி, ஹெச்டிஎஃப்சி வங்கி, எஸ்பிஐ, ஹிந்துஸ்தான் யுனிலீவர், இன்ஃபோசிஸ், ஓஎன்ஜிசி உள்ளிட்ட 7 நிறுவனங்கள், அவற்றின் சந்தை மதிப்பில் ரூ.41,687 கோடி வரை அதிகரித்துக் கொண்டுள்ளன.

இதில், அதிகபட்சமாக, ஹெச்டிஎஃப்சி நிறுவனம், ரூ.11,309 கோடியை தனது சந்தை மதிப்பில் உயர்த்திக் கொண்டுள்ளது.

அதேசமயம், டிசிஎஸ், ரிலையன்ஸ் இன்டஸ்ட்ரீஸ், கோல் இந்தியா ஆகிய 3 நிறுவனங்கள், அவற்றின் சந்தை மதிப்பில், ரூ.8,484 கோடி சரிவை சந்தித்தும் உள்ளன.

சந்தை மதிப்பின் அடிப்படையில், டிசிஎஸ் தொடர்ந்து முதலிடத்தில் நீடிக்கிறது. ரிலையன்ஸ் இன்டஸ்ட்ரீஸ், ஹெச்டிஎஃப்சி வங்கி, ஐடிசி, இன்ஃபோசிஸ், ஹெச்டிஎஃப்சி நிறுவனம், கோல் இந்தியா, ஓஎன்ஜிசி, ஹிந்துஸ்தான் யுனிலீவர் மற்றும் எஸ்பிஐ ஆகியவை அதற்கடுத்த இடங்களிலும் உள்ளதாக, செபி குறிப்பிட்டுள்ளது.