முன்னணி நிறுவனங்களில் 7ன் சந்தை மதிப்பு ரூ.52,298 கோடி சரிவு

கடந்த வார வர்த்தகத்தில், நாட்டின் முன்னணி நிறுவனங்களில் 7ன் ஒட்டுமொத்த சந்தை மதிப்பு ரூ.52,298 கோடி சரிவடைந்துள்ளது.

மும்பை பங்குச்சந்தையில் வர்த்தகமாகும் நிறுவனங்களின் சந்தை மதிப்பை அடிப்படையாகக் கொண்டு, இந்திய அளவில் முதல் 10 நிறுவனங்கள் பட்டியலிடப்படுகின்றன. இதன்படி, வாரந்தோறும் முன்னணி நிறுவனங்களின் பட்டியலை பங்கு பரிவர்த்தனை வாரியமான செபி வெளியிட்டுவருகிறது.

கடந்த வாரத்திற்கான பட்டியல் தற்போது வெளியிடப்பட்டுள்ளது. இதில், டிசிஎஸ், ரிலையன்ஸ் இன்டஸ்ட்ரீஸ், ஐடிசி, இன்ஃபோசிஸ், ஹெச்டிஎப்சி, கோல் இந்தியா, ஹிந்துஸ்தான் யுனிலீவர் உள்ளிட்ட 7 நிறுவனங்களின் சந்தை மதிப்பு, ரூ.52,298 கோடி சரிவடைந்துள்ளதாகக் கூறப்பட்டுள்ளது.

அதிகபட்சமாக, டிசிஎஸ் நிறுவனம், அதன் சந்தை மதிப்பில் ரூ.25,300 கோடியை இழந்துள்ளது. சென்ற வாரம், பங்குச்சந்தைகளில் முதலீட்டாளர்கள் பங்குகளை விற்று, லாபத்தை அதிகளவில் வெளியே எடுத்தனர். இதனால், வார அளவில் பங்குச்சந்தைகள் சரிவுடன் காணப்படுகின்றன. இதுவே, இந்த 7 நிறுவனங்களின் சந்தை மதிப்பு பாதிப்பதற்கான காரணம் என்று செபி தெரிவித்துள்ளது.

அதேசமயம், ஹெச்டிஎப்சி வங்கி, ஓஎன்ஜிசி, எஸ்பிஐ ஆகியவை மட்டும், அவற்றின் ஒட்டுமொத்த சந்தை மதிப்பில் ரூ.23,664 கோடி உயர்வை சந்தித்துள்ளன.

இதன்படி, முதல் 10 நிறுவனங்களின் பட்டியலில், டிசிஎஸ் தொடர்ந்து முதலிடத்தில் உள்ளது. ரிலையன்ஸ் இன்டஸ்ட்ரீஸ், ஹெச்டிஎப்சி வங்கி, ஐடிசி, இன்ஃபோசிஸ், ஹெச்டிஎப்சி கடன் வழங்கும் நிறுவனம், கோல் இந்தியா, ஓஎன்ஜிசி, எஸ்பிஐ மற்றும் ஹிந்துஸ்தான் யுனிலீவர் ஆகிய நிறுவனங்கள் அதற்கடுத்த இடங்களிலும் உள்ளதாக, செபி குறிப்பிட்டுள்ளது.