சீனாவில் உபெர் டாக்ஸி வர்த்தகம் பாதிப்பு

அதிக மக்கள்தொகை கொண்ட நாடான சீனாவில் உபெர் நிறுவனத்தின் டாக்ஸி சேவை எதிர்பார்த்த பலன் கொடுக்கவில்லை என தகவல் வெளியாகியுள்ளது.

இந்தியா, சீனா போன்ற நாடுகளில் மக்கள் தொகை அதிகம் என்பதால், இந்நாடுகளில் குறைந்த கட்டணத்தில் டாக்ஸி சேவை வழங்க, உபெர், ஓலா போன்ற நிறுவனங்கள் ஆர்வம் காட்டிவருகின்றன. குறிப்பாக, அமெரிக்காவைச் சேர்ந்த உபெர் நிறுவனம் அமெரிக்கா, சீனா போன்ற நாடுகளில் பெரும் ஏற்பாடுகளுடன் டாக்ஸி சேவையை வழங்கிவருகிறது. இந்தியாவிலும் அதன் வர்த்தகத்தை விரிவுபடுத்தும் பணிகளில் ஈடுபட்டுள்ளது.

அதேசமயம், சீனாவில் உபெர் நிறுவனத்தின் டாக்ஸி சேவைக்கு எதிர்பார்த்த வரவேற்பு இல்லை எனத் தகவல் வெளியாகியுள்ளது. அமெரிக்க சார்பு நிறுவனம் என்பதால், அந்நிறுவனத்தின் சேவையை சீன மக்கள் பெரிய அளவில் நம்பவில்லை என்றும் கூறப்படுகிறது. இதையடுத்து, வர்த்தக இழப்பை சமாளிக்கும் விதமாக, சீனாவின் முன்னணி டாக்ஸி நிறுவனமான டிடி சூஸிங் உடன் தனது சேவையை ஒருங்கிணைக்க, உபெர் முடிவு செய்துள்ளது.

மேலும், சீன சந்தையில் பாதிப்பு ஏற்பட்டாலும், அதனை இந்திய சந்தை மூலமாக ஈடுகட்ட உபெர் திட்டமிட்டுள்ளது. இதன்படி, இந்திய அளவில் வர்த்தகத்தை கூடுதல் செலவில் விரிவுபடுத்த உள்ளதாகவும், ஓலா கேப்ஸ் போன்ற நிறுவனங்களை சமாளித்து, புதிய வர்த்தக தந்திரங்களை அமல்படுத்த போவதாகவும் உபெர் தெரிவித்துள்ளது.