வேலையின்மைப் பிரச்சினை ஒரு வழியா குறைஞ்சிருச்சு!

சென்ற ஆண்டின் தொடக்கத்தில் இந்தியாவில் கொரோனா உயிரிழப்புகள் அதிகமாக இருந்ததால், மார்ச் மாத இறுதியில் நாடு தழுவிய ஊரடங்கு அமல்படுத்தப்பட்டது. இதனால் பெரும்பாலானோர் தங்களது வேலையை இழந்தனர். வீட்டிலிருந்தே வேலை பார்க்கும் வாய்ப்பு கிடைத்தவர்கள் தவிர்த்து மற்ற அனைவரும் பாதிக்கப்பட்டனர். சிலருக்கு ஊரடங்கு தளர்ந்து மீண்டும் வேலைவாய்ப்புகள் கிடைத்த நிலையில், பலர் நிரந்தரமாகவே தங்களது வேலையை இழந்தனர்.

இந்தியாவில் வேலையின்மைப் பிரச்சினை நீண்ட காலமாகவே தீவிரமாக இருந்துவரும் நிலையில், கொரோனா பாதிப்பால் நிலைமை இன்னும் மோசமாகியது. இந்தியப் பொருளாதாரக் கண்காணிப்பு மையம் வெளியிட்டுள்ள அறிக்கையின்படி, ஜூன் 13ஆம் தேதி நிறைவடைந்த வாரத்தில் இந்தியாவில் வேலையின்மை விகிதம் 8.7 சதவீதமாகக் குறைந்துள்ளது. இது கடந்த ஆறு வாரங்களில் மிகக் குறைந்த அளவாகும். பல்வேறு இடங்களில் ஊரடங்கு தளர்த்தப்பட்டுள்ளதால் இந்த முன்னேற்றம் ஏற்பட்டுள்ளது.

பணவீக்கப் பிரச்சினையில் இந்தியா! பெட்ரோல் விலை உயர்வால் வந்த வினை!
வேலையின்மை விகிதத்தில், நகர்ப்புறங்களில் மட்டும் 9.7 சதவீதம் பதிவாகியுள்ளது. அதற்கு முந்தைய வாரத்தில் நகர்ப்புற வேலையின்மை விகிதம் 14.7 சதவீதமாக இருந்தது. கிராமப்புறங்களில் வேலையின்மை விகிதம் 10.63 சதவீதத்திலிருந்து 8.23 சதவீதமாகக் குறைந்துள்ளது. முன்னதாக மே மாதத்தில் இந்தியாவின் மொத்த வேலையின்மை விகிதம் 12 சதவீதமாக இருந்தது. அதற்கு முந்தைய ஏப்ரல் மாதத்தில் வேலையின்மை விகிதம் 7.97 சதவீதமாக இருந்தது. அந்த மாதத்தில் மட்டும் மொத்தம் 73.5 லட்சம் பேர் தங்களது வேலையை இழந்தனர்.