வீட்டுக் கடன் வட்டி குறைப்பு... அரசு வங்கி அறிவிப்பு!

தீபாவளிப் பண்டிகையை ஒட்டிய பண்டிகை சீசன் நெருங்கும் சமயத்திலேயே பல்வேறு வங்கிகள் தங்களது வாடிக்கையாளர்களுக்கு வீட்டுக் கடன், வாகனக் கடன், நகைக் கடன் உள்ளிட்ட பல்வேறு கடன்களுக்கான வட்டி விகிதங்களைக் குறைத்தன. வட்டிக் குறைப்பு மட்டுமல்லாமல் செயல்பாட்டுக் கட்டணம் ரத்து உள்ளிட்ட சலுகைகளையும் அறிவித்து வருகின்றன. அந்த வகையில் இந்தியாவின் மிகப் பெரிய பொதுத் துறை வங்கிகளில் ஒன்றான யூனியன் பேங்க் ஆஃப் இந்தியா வட்டிக் குறைப்பை அறிவித்துள்ளது.

யூனியன் பேங்க் தற்போது வெளியிட்டுள்ள அறிவிப்பின்படி, வீட்டுக் கடன்களுக்கான வட்டி விகிதம் 6.4 சதவீதமாகக் குறைக்கப்பட்டுள்ளது. வங்கித் துறையிலேயே வீட்டுக் கடன்களுக்கான வட்டி விகிதம் இந்த வங்கியில்தான் தற்போது குறைவாக இருக்கிறது. இந்த வட்டிக் குறைப்பானது இன்று (அக்டோபர் 27) முதல் அமலுக்கு வந்துள்ளது. இந்த வட்டிச் சலுகையானது அனைத்து வாடிக்கையாளர்களுக்கும் பொருந்தாது. கிரெடிட் ஸ்கோர் 800க்கு மேல் உள்ளவர்களுக்கு மட்டுமே இச்சலுகை கிடைக்கும். அதை விடக் குறைவாக இருந்தால் வட்டி விகிதம் அதிகமாக இருக்கும்.

வீட்டுக் கடன் வட்டி தள்ளுபடி.. அதிரடி அறிவிப்பு!
யூனியன் பேங்க் ஆஃப் இந்தியா வங்கிக்கு முன்பாக , கொடாக் மகிந்திரா வங்கிதான் குறைந்த வட்டிக்கு வீட்டுக் கடன் வழங்கும் வங்கியாக இருந்தது. அந்த வங்கியில் வீட்டுக் கடன் வட்டி விகிதம் 6.5 சதவீதமாக உள்ளது. அதைத் தொடர்ந்து பஞ்சாப் & சிந்த் பேங்க் - 6.65%, ஸ்டேட் பேங்க் ஆஃப் இந்தியா - 6.7%, டாடா கேப்பிட்டல் - 6.7%, பேங்க் ஆஃப் பரோடா - 6.75%, பஜாஜ் ஃபின்செர்வ் - 6.75%, பஞ்சாப் நேஷனல் பேங்க் - 6.8% என்ற விகிதத்தில் வீட்டுக் கடன் வழங்குகின்றன.