சீனியர் சிட்டிசன்களுக்கு சிறந்த வசதி.. மொபைல் இருந்தால் போதும்!

யூனியன் பாங்க் ஆப் இந்தியா (Union Bank of India) வங்கி தனது வாடிக்கையாளர்கள் மிக எளிதாக மொபைலில் வாட்சப் (Whatsapp) வழியாக Form 15G மற்றும் Form 15H படிவங்களை சமர்ப்பிப்பதற்கான வசதியை அறிமுகப்படுத்தியுள்ளது.

Form 15G மற்றும் Form 15H என்றால் என்ன?

வைப்பு நிதி திட்டங்களில் (Fixed deposit) முதலீடு செய்தவர்கள் தங்களுக்கு கிடைக்கும் வட்டி வருமானத்துக்கு டிடிஎஸ் (TDS) வரி வசூலிக்கக்கூடாது என்பதற்கு தாக்கல் செய்ய வேண்டிய படிவம் Form 15G. இந்த படிவத்தை வங்கியில் சமர்ப்பித்தால் டிடிஎஸ் வரி வசூலிக்கப்படாது.

60 வயதை தாண்டிய சீனியர் சிட்டிசன்கள் வைப்பு நிதி திட்டத்தில் தங்களுக்கு கிடைக்கும் வட்டி வருமானத்துக்கு டிடிஎஸ் வரி பிடித்தம் செய்யக்கூடாது என்பதற்கு வங்கியிடம் Form 15H படிவத்தை சமர்ப்பிக்க வேண்டும்.

யூனியன் வங்கியின் வாட்சப் வசதி

இந்நிலையில், யூனியன் வங்கி தனது வாடிக்கையாளர்கள் மொபைலில் வாட்சப் வழியாகவே Form 15G மற்றும் Form 15H சமர்ப்பிப்பதற்கான வசதியை அறிமுகப்படுத்தியுள்ளது.

இதன்படி யூனியன் வங்கி வாடிக்கையாளர்கள் தங்கள் மொபைலில் 9666606060 என்ற எண்ணுக்கு மெசேஜ் அனுப்ப வேண்டும். 60 வயதுக்கு உட்பட்டவர்கள் Form 15G படிவத்தையும் 60 வயதை தாண்டியவர்கள் Form 15H படிவத்தையும் சமர்ப்பிக்கலாம். ஏழு மொழிகளில் இந்த சேவை வழங்கப்படுகிறது.

சீனியர் சிட்டிசன்களுக்கு நல்ல வசதி

இந்த வாட்சப் வசதி எல்லா வாடிக்கையாளர்களுக்குமே பயனளிக்கும் வகையில் இருந்தாலும் கூட, சீனியர் சிட்டிசன்களுக்கு நல்ல சேவையாக அறிமுகமாகியுள்ளது. இதன் மூலம் சீனியர் சிட்டிசன்கள் வீண் அலைச்சலை தவிர்த்து வாட்சப்பிலேயே Form 15H சமர்ப்பிக்கலாம்.