பால் இறக்குமதி.. அப்படி ஒரு ஐடியாவே இல்லை.. வதந்திகளை நிராகரித்த இந்திய அரசு!

பால் மற்றும் பால் பொருட்களை இறக்குமதி செய்ய இந்திய அரசுக்கு எந்த திட்டமும் இல்லை என மத்திய கால்நடை வளர்ப்பு துறை செயலாளர் ராஜேஷ் குமார் சிங் தெரிவித்துள்ளார்.

இந்தியாவில் பால் மற்றும் பால் பொருட்கள் உற்பத்தி குறைந்துள்ளதாகவும், இதனால் தேவையை சமாளிக்க பால் மற்றும் பால் பொருட்களை இறக்குமதி செய்ய இந்திய அரசு முடிவு செய்துள்ளதாகவும் ஊடகங்களில் கடந்த சில தினங்களாக செய்திகள் பரவின.

இதனால் பால் விவசாயிகள் மத்தியில் அதிர்ச்சியும், பரபரப்பும் ஏற்பட்டது. ஏனெனில், உலகிலேயே இந்தியாதான் மிகப்பெரிய பால் உற்பத்தியாளர். 2022ஆம் நிதியாண்டில் மட்டும் உலகின் மொத்த பால் உற்பத்தியில் இந்தியாவுக்கு 24% பங்கு இருந்துள்ளது.

இந்தியா முழுவதும் பால் விவசாயிகள் பல கோடி லிட்டர் பால் உற்பத்தி செய்து வருகின்றனர். இந்த சூழலில், பால் பற்றாக்குறையால் இறக்குமதி செய்ய அரசு திட்டமிட்டுள்ளதாக வெளியான தகவல் விவசாயிகள் மத்தியில் பரபரப்பை ஏற்படுத்தியது.

இந்நிலையில், பால் மற்றும் பால் பொருட்கள் இறக்குமதி செய்ய இந்திய அரசுக்கு எந்த முடிவும் எடுக்கவில்லை என மத்திய கால்நடை வளர்ப்பு துறை செயலாளர் ராஜேஷ் குமார் சிங் தெரிவித்துள்ளார். மேலும், பால் விவசாயிகளின் நலனை முதன்மையாக வைத்தே அனைத்து கொள்கை முடிவுகளையும் கால்நடை வளர்ப்பு துறை எடுத்து வருவதாக அவர் தெரிவித்துள்ளார்.

கடந்த பிப்ரவரி மாதம் இந்தியாவில் நெய் கையிருப்பு கணிசமாக உயர்ந்துள்ளதாகவும், தொடர்ந்து நெய் கையிருப்பு அதிகரிக்கும் என எதிர்பார்க்கப்படுவதாகவும் அவர் தெரிவித்துள்ளார். மேலும், கோடைக்காலத்துக்கு தேவையான அளவுக்கு பால் பவுடர் கையிருப்பில் இருப்பதாகவும் அவர் தெரிவித்துள்ளார்.