BVR Subrahmanyam: நிதி ஆயோக் புதிய தலைவர் இவர்தான்.. யார் இந்த பி.வி.ஆர்.சுப்ரமணியம்?

மத்திய அரசுக்கான பொருளாதார ஆலோசனை அமைப்பான நிதி ஆயோக் (Niti Aayog) புதிய தலைவராக முன்னாள் ஐஏஎஸ் அதிகாரி பி.வி.ஆர்.சுப்ரமணியம் நியமிக்கப்பட்டுள்ளார்.

நிதி ஆயோக் தலைவராக இதுவரை பரமேஸ்வரன் ஐயர் பதவி வகித்து வந்த நிலையில், அவருக்கு உலக வங்கியின் தலைமை இயக்குநராக பதவி வழங்கப்பட்டுள்ளது. இதைத்தொடர்ந்து, நிதி ஆயோக் தலைவராக பி.வி.ஆர்.சுப்ரமணியம் நியமிக்கப்பட்டுள்ளார்.

பி.வி.ஆர்.சுப்ரமணியம் 1987 பேட்ச் சத்தீஸ்கர் கேடர் ஐஏஎஸ் அதிகாரி. இவர் கடந்த ஆண்டில் இந்திய வர்த்தக மேம்பாட்டு அமைப்பின் (ITPO) தலைவராக நியமிக்கப்பட்டார். செப்டம்பர் 30ஆம் தேதியுடன் அவர் பணி ஓய்வுபெற்ற நிலையில், ஒப்பந்த அடிப்படையில் இந்திய வர்த்தக மேம்பாட்டு அமைப்பின் தலைவராக நியமிக்கப்பட்டார்.

இந்நிலையில், நிதி ஆயோக் தலைவராக பி.வி.ஆர்.சுப்ரமணியத்தை நியமிக்க கேபினட்டின் நியமன கமிட்டி ஒப்புதல் அளித்துள்ளது. இதன்படி, பதவி ஏற்ற நாள் முதல் இரண்டு ஆண்டுகளுக்கு நிதி ஆயோக் தலைவராக சுப்ரமணியம் பதவி வகிப்பார் என மத்திய அரசு உத்தரவு கூறுகிறது.

இதுவரை நிதி ஆயோக் தலைவராக பதவி வகித்த பரமேஸ்வரன் ஐயர் அமெரிக்காவில் வாஷிங்டனில் உள்ள உலக வங்கியின் தலைமை அலுவலகத்தில் தலைமை இயக்குநராக மூன்று ஆண்டுகளுக்கு நியமிக்கப்பட்டுள்ளார்.

அவருக்கு முன் உலக வங்கியின் தலைமை அலுவலகத்தில் தலைமை இயக்குநராக பதவி வகித்த ராஜேஷ் குல்லார் ஐஏஎஸ் மீண்டும் ஹரியானாவுக்கே திரும்பியுள்ள நிலையில், அந்த பதவி பரமேஸ்வரன் ஐயருக்கு வழங்கப்பட்டுள்ளது.

இதுமட்டுமல்லாமல், பொதுத் துறை நிறுவனமான ஐடிஐ லிமிட்டெட் தலைவராக ராஜேஷ் ராய் நியமிக்கப்பட்டுள்ளதாக மத்திய அரசு வெளியிட்டுள்ள மற்றொரு உத்தரவில் தெரிவித்துள்ளது. ராஜேஷ் ராய் இதுவரை எம்டிஎன்எல் நிறுவனத்தின் பொது மேலாளராக பதவி வகித்தது குறிப்பிடத்தக்கது.