மகிளா சம்மான் சேமிப்பு திட்டம்.. பெண்களின் வருமானத்துக்கு வரி.. மத்திய அரசு அறிவிப்பு!

பெண்களுக்காக அறிமுகப்படுத்த சிறு சேமிப்பு திட்டமான மகிளா சம்மான் சேமிப்பு திட்டத்தில் (Mahila Samman Savings Scheme) கிடைக்கும் வட்டி வருமானத்துக்கு வரி விதிக்கப்படும் என மத்திய அரசு தெரிவித்துள்ளது.

2023 மத்திய பட்ஜெட்டில், பெண்களுக்காக மகிளா சம்மான் சேமிப்பு திட்டம் என்ற புதிய சேமிப்பு திட்டம் அறிமுகப்படுத்தப்படும் என நிதியமைச்சர் நிர்மலா சீதாராமன் அறிவித்தார். இதன்படி, ஏப்ரல் 1ஆம் தேதி முதல் மகிளா சம்மான் சேமிப்பு திட்டம் தொடங்கப்பட்டது.

மகிளா சம்மான் சேமிப்பு திட்டத்தில் பெண்கள் மட்டுமே இணைய முடியும். இத்திட்டத்தில் ஆண்டுக்கு 7.5 சதவீதம் வட்டி வழங்கப்படும். இரண்டு ஆண்டுகளுக்குமே இந்த 7.5 சதவீத வட்டி நிர்ணயிக்கப்பட்டுள்ளது. இரண்டு ஆண்டுகளுக்கு மட்டுமே இத்திட்டம் கொண்டுவரப்பட்டுள்ளதால் 2025ஆம் ஆண்டு மார்ச் 31ஆம் தேதி வரை மட்டுமே இத்திட்டத்தில் முதலீடு செய்ய முடியும்.

மகிளா சம்மான் சேமிப்பு திட்டத்தில் குறைந்தபட்சம் 1000 ரூபாய் முதலீடு செய்ய வேண்டும். அதிகபட்சமாக 2 லட்சம் ரூபாய் வரை முதலீடு செய்யலாம். இந்நிலையில், மகிளா சம்மான் சேமிப்பு திட்டத்தில் கிடைக்கும் வட்டி வருமானத்துக்கு வரி விதிக்கப்படும் என மத்திய அரசு தெரிவித்துள்ளது.

அதாவது, மகிளா சம்மான் சேமிப்பு திட்டத்தில் கிடைக்கும் வட்டி வருமானத்துக்கு வருமான வரி சட்டம் பிரிவு 194A கீழ் டிடிஎஸ் வரி (TDS) வசூலிக்கப்படும் என மத்திய அரசு தெரிவித்துள்ளது.

மகிளா சம்மான் சேமிப்பு திட்டத்தின் பயனாளிகள் ஆண்டுக்கு 40,000 ரூபாய்க்கு மேல் வட்டி வருமானம் பெற்றால் அதற்கு டிடிஎஸ் வரி வசூலிக்கப்படும் என மத்திய அரசு தெரிவித்துள்ளது. ஏற்கெனவே வங்கிகள், தபால் அலுவலகம், கூட்டுறவு வங்கிகளில் வைப்பு நிதி (FD) வாயிலாக கிடைக்கும் வட்டி வருமானத்துக்கு இதே டிடிஎஸ் வரி விதிக்கப்பட்டு வருகிறது.

இந்நிலையில், மகிளா சம்மான் சேமிப்பு திட்டத்திலும் பயனாளிகள் ஆண்டுக்கு 40,000 ரூபாய்க்கு மேல் வருமானம் ஈட்டினால் டிடிஎஸ் வரி வசூலிக்கப்படும் என மத்திய நேரடி வரிகள் வாரியம் தெளிவுபடுத்தியுள்ளது. சீனியர் சிட்டிசன்களை பொறுத்தவரை ஆண்டுக்கு 50,000 ரூபாய்க்கு மேல் வட்டி வருமானம் பெற்றால் டிடிஎஸ் வரி வசூலிக்கப்படும்.