சுற்றுலா துறையில் கொட்டும் பணம்.. ஒரே ஆண்டில் 100% எகிறிய வருவாய்!

கடந்த ஆண்டில் இந்தியாவில் சுற்றுலா துறை வாயிலான அந்நிய செலாவணி வருவாய் 100% மேல் உயர்ந்துள்ளதாக மத்திய அரசு தகவல் வாயிலாக தெரியவந்துள்ளது.

2020, 2021 ஆண்டுகளில் கொரோனா நெருக்கடி காலகட்டத்தில் இந்தியா மட்டுமல்லாமல் உலகம் முழுவதுமே சுற்றுலா துறை கடுமையாக பாதிக்கப்பட்டது. இதனால் இந்தியாவுக்கு சுற்றுலா வாயிலாக கிடைக்கக்கூடிய அந்நிய செலாவணி வருவாய் சரிந்துவிட்டது.

இந்நிலையில், 2021ஆம் ஆண்டை காட்டிலும் 2022ஆம் ஆண்டில் சுற்றுலா துறை வாயிலாக அந்நிய செலாவணி வருவாய் 107% உயர்ந்துள்ளதாக மத்திய அரசு தகவல் வெளியிட்டுள்ளது. அதாவது 2021ஆம் ஆண்டில் இந்தியாவுக்கு சுற்றுலா வாயிலாக கிடைத்த அந்நிய செலாவணி வருவாய் 65,070 கோடி ரூபாய்.

2022ஆம் ஆண்டில் இந்தியாவுக்கு சுற்றுலா வாயிலாக கிடைத்த அந்நிய செலாவணி வருவாய் 1,34,543 கோடி ரூபாயாக உயர்ந்துள்ளது என மத்திய அரசு தகவல் வெளியாகியுள்ளது. 2022ஆம் ஆண்டில் கொரோனா பாதிப்பு குறைந்து சுற்றுலா துறை மீண்டு வந்துள்ளதையே இந்த வருவாய் வளர்ச்சி காட்டுகிறது.

இதுகுறித்து நாடாளுமன்றத்தில் சுற்றுலா துறை இணை அமைச்சர் கிஷான் ரெட்டி வெளியிட்டுள்ள தகவல்படி, 2022ஆம் ஆண்டில் இந்தியாவுக்கு வெளிநாடுகளில் இருந்து 61.9 லட்சம் பயணிகள் வருகை தந்துள்ளனர். 2021ஆம் ஆண்டில் வந்த வெளிநாட்டு பயணிகளின் எண்ணிக்கை வெறும் 15.2 லட்சம் மட்டுமே என்பது குறிப்பிடத்தக்கது.

சுற்றுலா பயணிகளுக்காக 1363 என்ற இலவச உதவி எண்ணையும் மத்திய அரசு அறிமுகப்படுத்தியுள்ளது. இந்த எண்ணுக்கு சுற்றுலா பயணிகள் தொடர்புகொண்டால் ஆங்கிலம், இந்தி, ஜெர்மன், பிரெஞ்சு, ஸ்பானிஷ், இத்தாலியன், போர்ச்சுகீஸ், ரஷ்ய, சீன, ஜப்பானிய, கொரிய, அரேபிய மொழிகளில் உதவி வழங்கப்படும் எனவும் அமைச்சர் தெரிவித்துள்ளார்.