உச்ச நீதிமன்றம் உத்தரவு
கடந்த நவம்பர் மாதம் உச்ச நீதிமன்றம் தொழிலாளர் பென்சன் திட்டம் 2014 திருத்தச் சட்டத்தை உறுதி செய்தது. இதனால், பென்சன் பங்களிப்புக்கான சம்பள உச்சவரம்பு மாதம் 15000 ரூபாயாக உயர்த்தப்பட்டது. மேலும், உச்சவரம்பையும் தாண்டி ஊழியர்கள் தங்கள் அடிப்படை சம்பளத்தில் 8.33% தொகையை பங்களிப்பாக செலுத்த உச்ச நீதிமன்றம் அனுமதித்தது.
பென்சன் உயரும்
பென்சன் திட்டத்தில் பங்களிப்பு தொகையை உயர்த்துவதால் பயனாளி ஓய்வுக்காலத்தில் அதிக ஓய்வூதியம் பெற முடியும். இது EPFO பென்சன் பயனாளிகளுக்கு பெரும் நிவாரணம் அளிக்கும் தீர்ப்பாக வெளிவந்தது.
விண்ணப்பமும் கடைசி தேதியும்
EPFO பென்சன் தொகையை உயர்த்திக்கொள்வதற்கு விண்ணப்பிக்க கடைசி தேதி மார்ச் 3ஆம் தேதியுடன் முடிவடைய இருந்த நிலையில் பின்னர் மே 3ஆம் தேதி வரை நீட்டித்தது EPFO நிறுவனம். இன்றுடன் கடைசி தேதி முடிவடைய இருந்தது.
தொழில்நுட்ப சிக்கல்கள்
மே 3ஆம் தேதி கடைசி தேதி முடிவடைய இருந்தாலும் EPFO இணையதளத்தில் பல்வேறு தொழில்நுட்ப சிக்கல்கள் தொடர்ந்து நீடித்து வந்ததால் பயனாளிகள் தங்களது விண்ணப்பத்தை சமர்ப்பிக்க முடியாமல் போனது. இதனால், கடைசி தேதியை மேலும் நீட்டிக்க வேண்டும் என அரசுக்கு EPFO பயனாளிகள், சங்கங்கள் தரப்பில் வலியுறுத்தப்பட்டது.
கடைசி தேதி நீட்டிப்பு
இந்நிலையில், EPFO பென்சன் தொகையை உயர்த்திக்கொள்ள விண்ணப்பிப்பதற்கான கடைசி தேதி ஜூன் 26 வரை நீட்டிக்கப்பட்டுள்ளதாக மத்திய அரசு தெரிவித்துள்ளது. ஊழியர்கள், நிறுவனங்கள் மற்றும் தொழிலாளர் நல சங்கங்கள் தரப்பில் வைக்கப்பட்ட கோரிக்கைகளின் அடிப்படையில் கடைசி தேதி நீட்டிக்கப்பட்டுள்ளதாக மத்திய அரசு தெரிவித்துள்ளது.