கச்சா எண்ணெய்க்கு மீண்டும் விண்ட்ஃபால் வரி.. இந்திய அரசு உத்தரவு!

கச்சா எண்ணெய் விலை திடீரென தாறுமாறாக உயரும்போது அதில் இருந்து அதிக லாபம் கிடைக்கிறது. இந்த லாபத்துக்கு மத்திய அரசு விண்ட்ஃபால் வரி (Windfall tax) விதித்து வருகிறது.

இந்நிலையில், உள்நாட்டில் உற்பத்தி செய்யப்படும் கச்சா எண்ணெய்க்கு ஒரு டன்னுக்கு 6400 ரூபாய் விண்ட்ஃபால் வரி விதித்து மத்திய அரசு உத்தரவிட்டுள்ளது. மேலும், டீசல் மீதான ஏற்றுமதி வரியை மத்திய அரசு ரத்து செய்துள்ளது.

பெட்ரோல் மற்றும் விமான எரிபொருள் (ATF) மீதான ஏற்றுமதி வரி விலக்கு தொடர்ந்து நீடிக்கும் என மத்திய அரசு தெரிவித்துள்ளது.

புதிய விண்ட்ஃபால் வரி மற்றும் இறக்குமதி வரி முறைகள் இன்று (ஏப்ரல் 19) முதல் அமல்படுத்தப்படும் என மத்திய மறைமுக வரிகள் மற்றும் சுங்க வாரியம் தெரிவித்துள்ளது.

எண்ணெய் உற்பத்தி நாடுகள் கச்சா எண்ணெய் உற்பத்தியை குறைக்க முடிவு செய்துள்ளதால் சர்வதேச சந்தையில் கச்சா எண்ணெய் விலை உயர்ந்து வருகிறது. இந்த சூழலில் கச்சா எண்ணெய்க்கு விண்ட்ஃபால் வரியை விதித்து இந்திய அரசு உத்தரவிட்டுள்ளது.

கச்சா எண்ணெய் மீதான விண்ட்ஃபால் வரி மற்றும் ஏற்றுமதி வரி விகிதங்களை 15 நாட்களுக்கு ஒருமுறை மத்திய அரசு ஆய்வு செய்து திருத்தங்களை மேற்கொண்டு வருகிறது.

கடந்த ஆண்டு ரஷ்யா - உக்ரைன் போர் ஏற்பட்ட போது சர்வதேச சந்தையில் கச்சா எண்ணெய் விலை மிக கடுமையாக உயர்ந்தது. அப்போது கச்சா எண்ணெய் விலை ஏற்றத்தால் கிடைக்கும் லாபத்துக்கு மத்திய அரசு விண்ட்ஃபால் வரியை அறிமுகப்படுத்தியது.