ஆசிய வளர்ச்சி வங்கி இயக்குனராக இந்திய வம்சாவளி பெண் தேர்வு

வாஷிங்டன்: ஆசிய வளர்ச்சி வங்கியின் இயக்குனர் பதவிக்கு இந்திய வம்சாவளி பெண்ணான சுவாதி தன்டேக்கரை நியமிக்க அதிபர் ஒபாமாவின் பரிந்துரைக்கு அமெரிக்க நாடாளுமன்றம் ஒப்புதல் அளித்துள்ளது.

ஆசிய வளர்ச்சி வங்கி பிலிப்பைன்ஸ் தலைநகர் மணிலாவில் கடந்த 1966-ஆம் ஆண்டு நிறுவப்பட்டது. ஆசியா கண்டத்திலுள்ள நாடுகளுக்கு கடனுதவி அளிக்கும் வகையில் சுமார் 67 நாடுகளை உறுப்பினர்களாக கொண்ட இந்த வங்கியில் உலகில் உள்ள பல நாடுகளுக்கு பங்குகளும், அந்த பங்குகளுக்கு ஏற்ப ஓட்டுரிமையும் உண்டு.

ஆசிய வங்கியின் தற்போதைய தலைவராக ஜப்பான் நாட்டைச் சேர்ந்த தகேகிகோ நகாவோ பதவி வகித்து வருகிறார். அவருக்கு கீழ் பணியாற்றும் இயக்குனர்கள் குழுமத்தில் அமெரிக்காவின் சார்பில் இடம்பெற்றுள்ள ராபர்ட் ஓர் என்பவரது பதவிக்காலம் விரைவில் முடிவடைகிறது.

எனவே, அந்த பதவிக்கு இந்திய வம்சாவளி பெண் சுவாதி தன்டேக்கரை நியமிக்க அதிபர் ஒபாமா பரிந்துரைத்திருந்தார்.

இந்நிலையில், அவரின் பரிந்துரைக்கு அந்நாட்டு நாடாளுமன்றம் ஒப்புதல் அளித்துள்ளது. இதனையடுத்து, ஆசிய வளர்ச்சி வங்கியின் இயக்குனராக விரைவில் சுவாதி தன்டேக்கர் பதவி ஏற்கவுள்ளார்.