முகூர்த்த நாள் எதிரொலி... எகிறிய காய்கறிகள், பழங்கள் விலை!

ஈரோடு வ.உ.சி. காய்கறி மார்க்கெட்டிற்கு ஒட்டன்சத்திரம், ஊட்டி, தாளவாடி, ஆந்திரா, எடப்பாடி, மேட்டுப்பாளையம், பெங்களூர், தாராபுரம் போன்ற பகுதிகளில் இருந்து காய்கறிகள் விற்பனைக்கு கொண்டு வரப்படுகிறது.

இங்கு வழக்கமாக 75 முதல் 90 டன் வரை காய்கறிகள் வரத்தாகி வரும். ஆனால் பரவலாக மழை பெய்தது காரணமாக காய்கறிகள் விளைச்சல் பாதிக்கப்பட்டு வரத்தும் குறைந்துவிட்டது. இதனால் இன்று வ.உ.சி. காய்கறி மார்க்கெட்டிற்கு வெறும் 50 டன் காய்கறிகள் மட்டுமே விற்பனைக்கு வந்து இருந்தது.

அதே சமயம் தொடர் முகூர்த்தம் காரணமாக காய்கறிகள் தேவை அதிகரித்து இதன் எதிரொலியாக விலையும் உயர்ந்துள்ளது. கடந்த வாரத்தை விட ஒரு சில காய்கறிகளின் விலை அதிகரித்துள்ளது.

இன்று வ.உ.சி. மார்க்கெட்டில் விற்பனை செய்யப்பட்ட காய்கறிகளின் விலை விவரம் கிலோவில் வருமாறு:-

கத்திரிக்காய் - 80 முதல் 90 ரூபாய், பீர்க்கங்காய் - 60 ரூபாய், புடலங்காய் - 50 ரூபாய், தக்காளி - 35 முதல் 40 ரூபாய், பெரிய வெங்காயம் - 30 ரூபாய், சின்ன வெங்காயம் - 80 ரூபாய், பீன்ஸ்-80 ரூபாய், கேரட் - 65 ரூபாய், பாவக்காய் - 60 ரூபாய், முட்டைக்கோஸ் - 20 ரூபாய், காலிபிளவர் - 30 ரூபாய், குடமிளகாய் -60 ரூபாய், முருங்கைக்காய் - 80 ரூபாய், பீட்ரூட் - 55 ரூபாய், வெண்டைக்காய் - 70 ரூபாய், முள்ளங்கி - 40 ரூபாய், சுரைக்காய் - 15 ரூபாய், சவ்சவ் - 20 ரூபாய், பட்ட அவரை - 80 ரூபாய், கருப்பு அவரை - 100 ரூபாய். இஞ்சி வரத்து வெகுவாக குறைந்து விட்டதால் விலை கிடுகிடு என உயர்ந்து இன்று ஒரு கிலோ 200 ரூபாய்க்கு விற்கப்படுகிறது.

ஈரோடு மார்க்கெட்டிற்கு பெங்களூர், மகாராஷ்ட்ரா, ஊட்டி கொடைக்கானல், ஆந்திரா, கிருஷ்ணகிரி போன்ற பகுதிகளில் இருந்து பழங்கள் வரத்தாகி வருகிறது. இங்கு நாளொன்றுக்கு 30 டன் வரை பழங்கள் வரத்தாகி வந்தன. தற்போது வரத்து குறைவால் இன்று 10 டன் பழங்கள் மட்டுமே வரத்தாகி இருந்தன.

இதேபோல் தொடர் முகூர்த்தம் காரணமாகவும், வரத்து குறைவு காரணமாகவும் ஈரோடு மார்க்கெட்டில் பழங்கள் விலை சற்று உயர்ந்துள்ளது. இன்று விற்கப்பட்ட பழங்களின் விலை கிலோவில் வருமாறு:-

கொய்யா-50 ரூபாய், செந்தூரம் மாம்பழம் - 50 ரூபாய், ஜில் பசந்த் மாம்பழம் - 70 ரூபாய், ருமேனியா மாம்பழம் -70 ரூபாய், கோப்பூர் அல்வா மாம்பழம்-60 ரூபாய், இமாம் பசந்த் மாம்பழம் - 50 ரூபாய், மாதுளை பழம் - 120 ரூபாய், ஆப்பிள் - 200 ரூபாய், ஆஸ்திரேலியா ஆரஞ்சு - 120 ரூபாய், சாத்துக்குடி-80 ரூபாய், பன்னீர் திராட்சை - 120 ரூபாய், சின்ன நாவல் பழம் - 240 ரூபாய், பெரிய நாவல் பழம் - 360 ரூபாய்.