யாஹூ நிறுவனத்தை 4.8 பில்லியன் டாலருக்கு வாங்குகிறது வெரிசான்

நியூயார்க்: பிரபல இணையதள தேடல் பொறி நிறுவனமான யாஹூவை, அமெரிக்க தகவல் தொடர்பு நிறுவனமான வெரிசான், 4.8 பில்லியன் டாலருக்கு வாங்க முடிவு செய்துள்ளது.

கடந்த வாரம் வெரிசான் நிறுவனம், யாஹூ நிறுவனத்துடன் பேச்சுவார்த்தை நடத்தியது. இதில் உடன்பாடு ஏற்பட்டதை அடுத்து, யாஹூ நிறுவனம் தனது பங்குகளை, வெரிசானுக்கு விற்க முடிவு செய்துள்ளது. கடந்த ஆண்டு ஏ.ஓ.எல் நிறுவனத்தை 4.4 பில்லியன் டாலருக்கு, வெரிசான் வாங்கியது குறிப்பிடத்தக்கது.

இந்நிலையில் தற்போது யாஹூ நிறுவனத்தின் தேடல் பொறி, செய்திகள், வணிகம், விளையாட்டு, வீடியோ சேவை, இ-மெயில், டம்ளர் சமூக தளம் ஆகியவை வெர்சான் நிறுவனத்திற்கு கீழ் செயல்பட உள்ளது. கடந்த 4 ஆண்டுகளாக தொடர்ந்து சரிவை நோக்கி சென்று கொண்டிருந்ததால், இந்த முடிவை எடுக்க நேர்ந்ததாக அந்நிறுவனத்தின் தலைமை செயல் அதிகாரி மரிசா மேயர் தெரிவித்துள்ளார்.

அடுத்த ஆண்டு தொடக்கத்தில் அனைத்து வர்த்தகமும் முழுமையாக வெரிசான் நிறுவனத்திற்கு கைமாறும் என்று எதிர்பார்க்கப்படுகிறது. கடந்த 2008ம் ஆண்டு மைக்ரோசாப்ட் நிறுவனம் 4,400 கோடி டாலர் கொடுத்து, யாஹூ நிறுவனத்தை வாங்க முயற்சித்தது. ஆனால் அப்போது யாஹூ மறுத்துவிட்டது.

ஒருசமயம் பேஸ்புக், கூகுள் ஆகிய நிறுவனங்களை வாங்க யாஹூ நிறுவனம் முயற்சித்தது குறிப்பிடத்தக்கது.