காலேஜ் முடிச்சிட்டு எப்படி சம்பாதிப்பது? சார்லி மங்கர் கொடுத்த அட்வைஸ்!

முதலீட்டில் சாதிக்க விரும்பும் இளம் தலைமுறையினருக்கு பிரபல முதலீட்டாளரான சார்லி மங்கர் (Charlie Munger) முக்கிய ஆலோசனை வழங்கியுள்ளார்.

பிரபல முதலீட்டாளர் வாரன் பஃபெட்டின் (Warren Buffett) வலது கரமாக கருதப்படும் சார்லி மங்கர் Berkshire Hathaway நிறுவனத்தின் துணைத் தலைவராக பதவி வகித்து வருகிறார். மேலும் முதலீடு, பைனான்ஸ், மார்க்கெட் பற்றிய ஆலோசனைகளையும் வழங்கி வருகிறார்.

இந்நிலையில், தற்போது இளம் தலைமுறையினர் சந்திக்கும் சிக்கல்கள் குறித்தும், அவர்களுக்கான முதலீட்டு வழிகள் குறித்தும் சார்லி மங்கர் ஆலோசனை வழங்கியுள்ளார். இளம் தலைமுறையினர் பணக்காரர்களாக வளருவது முன்பை விட இப்போது கடினமாகியுள்ளதாக சார்லி மங்கர் தெரிவித்துள்ளார்.

அதிக பணவீக்கம், ரியல் எஸ்டேட் விலை உயர்வு, முதலீடு செய்வதே கடினமாகிய நிலை போன்ற காரணங்கள் இளம் தலைமுறையினருக்கு சவால்களாக இருப்பதாக சார்லி மங்கர் கூறுகிறார். ஒரே ஆலோசனையை வைத்து அனைவரும் பணம் சம்பாதிக்கும் காலம் எல்லாம் கரையேறிவிட்டதாக அவர் கூறுகிறார்.

பல தரப்பட்ட பங்குகளில் (diversified portfolio) முதலீடு செய்வது அந்த காலத்தை போல இப்போது உதவாது என சார்லி மங்கர் கருதுகிறார். முந்தையை தலைமுறைகள் சந்தித்ததை விட இப்போதைய தலைமுறையினருக்கு முதலீடு என்பது சவாலாகவே இருக்கும் எனவும் அவர் தெரிவித்துள்ளார்.

கல்லூரி முடித்துவிட்டு வெளிவரும் இளைஞர்கள் எளிதாக முதலீடு செய்வதற்கான வாய்ப்புகள் எதிர்காலத்தில் இருக்காது என மங்கர் கூறுகிறார். இருப்பினும், முதலீடு சார்ந்த குழப்பங்களில் சிக்க வேண்டாம் என விரும்பினால் இண்டக்ஸ் ஃபண்ட்களில் (index funds) முதலீடு செய்யும்படி சார்லி மங்கர் அறிவுரை வழங்கியுள்ளார். முதலீட்டில் பொறுமைதான் முக்கியம் எனவும் அவர் தெரிவித்துள்ளார்.