மல்லையா, மோடியை இந்தியாவிடம் ஒப்படைப்போம் - போரிஸ் ஜான்சன்

கிங்ஃபிஷர் நிறுவனத் தலைவரான விஜய் மல்லையா இந்திய வங்கிகளிடம் ரூ.9000 கோடிக்கு மேல் கடன் வாங்கிவிட்டு திருப்பிச் செலுத்தாமல் நாட்டை விட்டே ஓடிவிட்டார். அதேபோல, மும்பையைச் சேர்ந்த வைர வியாபாரியான நீரவ் மோடி தனது உறவினர்களுடன் சேர்ந்து பஞ்சாப் நேஷனல் வங்கியில் போலியான ஆவணங்களைக் கொண்டு ரூ.13,000 கோடிக்கு மேல் கடன் வாங்கிவிட்டு தப்பிவிட்டார்.

இவர்கள் இருவருமே இங்கிலாந்து நாட்டில்தான் தஞ்சம் புகுந்தனர். அங்கு சொகுசு வாழ்க்கை வாழ்ந்தனர். இவர்கள் இந்தியாவிலிருந்து தப்பிச் சென்று சில ஆண்டுகள் ஆகிவிட்ட நிலையில், இந்தியாவின் பல்வேறு நீதிமன்றங்களில் இவர்கள் மீது நிறைய வழக்குகள் உள்ளன. இவர்கள் இருவருமே இந்தியாவில் தேடப்படும் பொருளாதாரக் குற்றவாளிகளாக அறிவிக்கப்பட்டுள்ளனர்.

நீரவ் மோடி மற்றும் விஜய் மல்லையா வாங்கிய கடனை அவர்களது உள்நாட்டு வெளிநாட்டு சொத்துகளை விற்பனை செய்து திரும்ப வசூலிக்கும் நடவடிக்கையில் அமலாக்கத் துறையினர் ஈடுபட்டுள்ளனர். அதேநேரம், இங்கிலாந்தில் உள்ள அவர்களை இந்தியாவுக்கு நாடு கடத்தும் முயற்சியில் இந்திய அரசு ஈடுபட்டுள்ளது. அதற்கான கோரிக்கையும் இங்கிலாந்து அரசிடம் வைக்கப்பட்டுள்ளது. ஆனால் சட்ட சிக்கல்கள் இருப்பதால் அவர்களை இந்தியாவுக்கு அனுப்பி வைப்பது தாமதமாகி வருகிறது.

மல்லையா - மோடியிடம் பல கோடி வசூல்!
இந்நிலையில், தற்போது இந்தியா வந்துள்ள இங்கிலாந்து பிரதமர் போரிஸ் ஜான்சன் இந்த விவகாரம் குறித்து இந்திய பிரதமர் நரேந்திர மோடியிடம் பேசியுள்ளார். விரைவில் அவர்கள் இந்தியாவுக்குக் கொண்டுவரப்படுவார்கள் எனவும் அவர் நரேந்திர மோடிக்கு உறுதியளித்துள்ளார். இதுபோன்ற மோசடியாளர்களை வைத்துக்கொள்ள தமது நாடு ஒருபோதும் விரும்புவதில்லை எனவும், அவர்கள் எப்போது இந்தியாவுக்கு செல்வார்கள் எனக் காத்துக் கொண்டிருப்பதாகவும் அவர் தெரிவித்துள்ளார். சட்ட ரீதியாக பிரச்சினைகள் இருப்பதையும் அவர் சுட்டிக் காட்டினார்.

இதுபோன்ற பொருளாதாரக் குற்றவாளிகளுக்கு இங்கிலாந்து ஒருபோதும் ஆதரவளிக்காது எனவும் போரிஸ் ஜான்சன் திட்டவட்டமாகத் தெரிவித்துள்ளார்.