வங்கி பங்குகளே வேண்டாம்பா.. கதவை பூட்டிய வாரன் பஃபெட்!

உலகளவில் பிரபல பங்கு சந்தை முதலீட்டாளரான வாரன் பஃபெட் தனது முதலீட்டு திறமையால் உலகின் மிகப்பெரிய பணக்காரர்களில் ஒருவராக வளர்ந்தவர். இப்போதும் உலகளவில் பங்கு சந்தை முதலீட்டாளர்களுக்கு வாரன் பஃபெட் ஒரு ஹீரோவாக இருக்கிறார்.

இந்நிலையில், வாரன் பஃபெட் பல ஆண்டுகளாக வைத்திருந்த சில வங்கிகளின் பங்குகளை முழுமையாக விற்றுவிட்டதாக தெரிவித்துள்ளார். இந்த குறிப்பிட்ட வங்கிகள் லாப கணக்குகளை தவறாக காட்டுவதாகவும், வங்கிகளின் தலைவர்கள் முட்டாள்தனமாக ரிஸ்க் எடுத்து வருவதாகவும் வாரன் பஃபெட் தெரிவித்துள்ளார்.

சம்பந்தப்பட்ட வங்கிகள் தங்களது வருமான கணக்கை தவறாக காட்டி முதலீட்டாளர்களை ஏமாற்றி வருவதாகவும், முட்டாள்தனமாக ரிஸ்க் எடுப்பதாகவும் தெரிவித்துள்ள வாரன் பஃபெட், இந்த வங்கிகள் தங்கள் செயலுக்கு தக்க தண்டனையை அனுபவிப்பார்கள் எனவும் தெரிவித்துள்ளார்.

ஏற்கெனவே அண்மையில் அமெரிக்காவின் சிலிக்கான் வேலி வங்கி, சிக்னேச்சர் வங்கி போன்ற வங்கிகள் திவாலாகிவிட்டன. இந்த சூழலில் வாரன் பஃபெட் தனது வங்கி பங்குகளை விற்பனை செய்துள்ளது முதலீட்டாளர்கள் வட்டாரத்தில் பரபரப்பை ஏற்படுத்தியுள்ளது.

முன்பை போல இப்போது வங்கி துறையின் தொழில் தனக்கு பிடிக்கவில்லை எனவும் வாரன் பஃபெட் தெரிவித்துள்ளார். வங்கிகளில் செயல்பாடுகளால் சுமார் 30 ஆண்டுகளுக்கு வைத்திருந்த பங்குகளை கூட விற்பனை செய்துவிட்டதாக வாரன் பஃபெட் தெரிவித்துள்ளார்.

ஜேபொ மோர்கன், கோல்ட்மேன் சாக்ஸ், வெல்ஸ் ஃபார்கோ, எம்&டி பேங்க், பிஎன்சி பைனான்ஸியல் ஆகிய வங்கிகளின் பங்குகளை வாரன் பஃபெட் முழுமையாக விற்பனை செய்துவிட்டார்

மறுபுறம் சிட்டிகுரூப், அலை பைனான்ஸியல், ஜெஃப்ரீஸ், நூபேங்க் ஆகிய வங்கிகளில் புதிதாக பங்குகளை வாங்கியுள்ளார். மேலும், அவரது முக்கிய பங்குகளில் ஒன்றான பேங்க் ஆஃப் அமெரிக்கா வங்கியில் தனது பங்கை 9% மேல் உயர்த்தியுள்ளார்.