பழைய பென்சன் திட்டத்தை கட்டாயம் அமல்படுத்துவோம்.. அரசு ஊழியர்களுக்கு வாக்குறுதி

இந்தியா முழுவதும் தமிழகம் உள்ளிட்ட பல்வேறு மாநிலங்களில் அரசு ஊழியர்களின் மிகப் பெரிய கோரிக்கையாக இருப்பது பழைய பென்சன் திட்டம்தான். மீண்டும் பழைய பென்சன் திட்டத்தை அமல்படுத்த வேண்டும் என்று CPS ஒழிப்பு அமைப்பினரும் பல்வேறு துறை சார்ந்த அரசு ஊழியர்களும் நீண்ட காலமாகவே தொடர்ந்து போராடி வருகின்றனர். ஆனால் தமிழகம் உள்ளிட்ட மாநிலங்களில் நிதி நிலையைக் காரணம் காட்டி இத்திட்டத்தை அமல்படுத்துவதில் சிக்கல் இருப்பதாகக் காரணம் கூறி வருகின்றனர்.

இந்நிலையில், இமாசலப் பிரதேசத்தில் தேர்தல் வாக்குறுதியாக பழைய பென்சன் திட்டத்தை அமல்படுத்துவதாக உறுதியளித்துள்ளனர். காங்க்ரா மாவட்டத்தில் நடைபெற்ற தேர்தல் பிரச்சாரத்தில், காங்கிரஸ் கட்சி பழைய பென்சன் திட்டத்தை கட்டாயம் அமல்படுத்துவதாக உறுதியளித்துள்ளது. பாஜக அரசு இந்த விஷயத்தில் அரசு ஊழியர்களை ஏமாற்றுவதாகவும், காங்கிரஸ் கட்சி ஆட்சிக்கு வந்தவுடன் இத்திட்டம் உறுதியாக அமல்படுத்தும் என்று அனைத்திந்திய காங்கிரஸ் கமிட்டி செயலாளர் ஆர்.எஸ்.பாலி தெரிவித்துள்ளார்.

தமிழ்நாட்டில் பழைய ஓய்வூதியத் திட்டம்? தமிழக அரசு ஊழியர்கள் நடை பயண போராட்டம்!

காங்கிரஸ் ஆட்சி அமைந்ததும் முதல் கேபினட் கூட்டத்திலேயே இதுகுறித்த முடிவு எடுக்கப்பட்டு அறிவிப்பு வெளியாகும் எனவும் அவர் உறுதியளித்துள்ளார். தேர்தல் நடைபெறவிருக்கும் காங்க்ரா மாவட்டத்தில் 15 அசம்பிலிகள் இருக்கும் நிலையில், இங்கு மொத்தமாக 90,000 அரசு ஊழியர்கள் தற்போது புதிய பென்சன் திட்டத்தின் கீழ் இருப்பதாகவும் அவர்களுக்கு பழைய பென்சன் திட்டத்தின் நன்மைகள் விரைவில் கிடைக்கும் எனவும் உறுதியளித்துள்ளார்.