பிஎஃப் பணத்தை எதற்கெல்லாம் எடுக்கலாம் தெரியுமா?

ஓய்வுக் காலத்தில் பயனளிக்கும் மிகச் சிறந்த சேமிப்புத் திட்டமாக தொழிலாளர் வருங்கால வைப்பு நிதி (EPF) கருதப்படுகிறது. நீண்ட கால அடிப்படையில் இது மிகச் சிறந்த சேமிப்புத் திட்டமாகும். இது ஓய்வுக் காலத்துக்கான நிதி என்பதால் அதை முன்கூட்டியே எடுத்துப் பயன்படுத்துவது சற்று சிரமமான காரியம்தான். இருந்தாலும் அவசரத் தேவைகளுக்கு வேறு வழியே இல்லை என்ற சூழலில் பிஎஃப் பணத்தை எடுக்கலாம். அதற்கும் சில விதிமுறைகள் உள்ளன. அவை என்னென்ன என்று இங்கே பார்க்கலாம்.

1. வேலையின்மை:

திடீரென வேலையை இழந்துவிட்டால் ஒரு மாத வேலையின்மைக்குப் பிறகு பிஎஃப் நிலுவைத் தொகையில் 75 சதவீதம் வரை எடுக்கலாம். மேலும் ஒரு மாதத்துக்கு வேலை இல்லாத நிலை நீடித்தால் மீதமுள்ள 25 சதவீதம் பிஎஃப் தொகையையும் எடுக்கலாம்.

2. வீடு வாங்க...

பிஎஃப் தொகையில் பகுதி அளவை எடுத்து வீடு வாங்க முடியும். ஒருவர் வீடு வாங்குவதற்காக அல்லது வீட்டைப் புதுப்பிப்பதற்காக ஈபிஎஃப் நிலுவைத் தொகையில் 90 சதவீதம் வரை எடுக்கலாம். அதேபோல, பிஎஃப் உறுப்பினர் அதற்கு முன்பு வீட்டுக் கடன் வாங்கியிருந்தால், அந்தக் கடனைத் திருப்பிச் செலுத்துவதற்கு பிஎஃப் நிலுவைத் தொகையில் 90 சதவீதம் வரை எடுக்கலாம்.

3. குழந்தையின் திருமணம்!

பிஎஃப் கணக்கு வைத்திருப்பவர் அவரது குழந்தையின் திருமணத்துக்காக தனது பங்களிப்பில் 50 சதவீதம் வரை எடுக்கலாம். ஆனால் இந்த நிபந்தனையின் கீழ் பிஎஃப் பணத்தை எடுப்பதற்கு அந்தக் கணக்கு குறைந்தது ஏழு ஆண்டுகள் முதிர்வுடன் இருக்க வேண்டும்.

4. கல்வி!

10ஆம் வகுப்பு தாண்டிய பிறகு கல்விச் செலவுகளுக்காக 50 சதவீதம் வரையில் பிஎஃப் பணத்தை எடுக்க முடியும். அந்த பிஎஃப் கணக்கு குறைந்தது 7 ஆண்டுகள் முதிர்வுடன் இருக்க வேண்டும்.

5. வீடு சீரமைப்பு!

வீட்டைப் புதுப்பிக்க பிஎஃப் பணத்தை எடுக்கலாம். அந்தக் கணக்கு 5 ஆண்டுகள் முதிர்வுடன் இருக்க வேண்டும். வீட்டைச் சீரமைக்க சந்தாதாரர் தனது சம்பளத்தில் 12 மடங்கு வரை எடுக்கலாம். அதேபோல, ஃபிளாட் அல்லது நிலம் வாங்குவதற்கு தனது சம்பளத்தின் 24 மடங்கு வரை பிஎஃப் பணத்தை எடுக்கலாம்.

6. மருத்துவ சிகிச்சை!

பிஎஃப் சந்தாதாரர் தனது மருத்துவ சிகிச்சைக்காகவோ அல்லது தனது, மனைவி, பெற்றோர் அல்லது குழந்தைகளின் மருத்துவ சிகிச்சைக்காகவோ 6 மாத அடிப்படை ஊதியம் மற்றும் அகவிலைப்படி அல்லது ஊழியர்களின் பங்குகளை வட்டியுடன் திரும்பப் பெறலாம். எனவே, ஒருவர் மருத்துவ சிகிச்சைக்காக ஒருவரின் சம்பளத்தின் 6 மடங்கு வரை திரும்பப் பெறலாம். இதற்கு குறைந்தபட்ச முதிர்வு காலம் எதுவும் தேவையில்லை.