Zomato Everyday: 89 ரூபாயில் வீட்டு முறை உணவு.. நேரா வீட்டுக்கே வரும்.. சொமேட்டோ அசத்தல் பிளான்!

சொமேட்டோ (Zomato) நிறுவனம் உணவு டெலிவரி சேவைகளில் முன்னணி நிறுவனமாக செயல்பட்டு வருகிறது. இதுமட்டுமல்லாமல், ஹோட்டலில் டைனிங் புக்கிங் உள்ளிட்ட சேவைகளையும் வழங்கி வருகிறது.

இந்நிலையில், சொமேட்டோ நிறுவனம், வீட்டு முறை உணவுகளை குறைந்த விலைக்கு டெலிவரி செய்யப்போவதாக அறிவித்துள்ளது. அதுவும், 89 ரூபாயிலேயே வீட்டு முறை உணவுகளை சொமேட்டோவில் வாங்கி டெலிவரியும் பெற்றுக்கொள்ளலாம் என்று தெரிவிக்கப்பட்டுள்ளது.

சொமேட்டோவில் பல்வேறு உணவகங்களில் பிரியாணி முதல் பீட்சா வரை பலவகையான உணவுகளை ஆர்டர் செய்து சாப்பிட முடியும். இருப்பினும், இளைஞர்கள், அலுவலகத்துக்கு செல்வோர், பேச்சிலர்கள் ஆகியோரின் தேவையை பூர்த்தி செய்யும் வகையில், வீட்டு முறை உணவுகளை குறைந்த விலைக்கு டெலிவரி செய்யப்போவதாக சொமேட்டோ நிறுவனம் தெரிவித்துள்ளது.

இந்த சேவைக்கு சொமேட்டோ எவரிடே (Zomato Everyday) என பெயர் வைக்கப்பட்டுள்ளது. இந்த வீட்டு முறை உணவின் விலை 89 ரூபாய் முதல் தொடங்குகிறது. தற்போது இந்த சேவை குருகிராமில் மட்டும் அறிமுகப்படுத்தப்பட்டுள்ளது. விரைவில் மற்ற நகரங்களுக்கும் இந்த சேவை கொண்டுவரப்படும் என எதிர்பார்க்கப்படுகிறது.

இந்த வீட்டுமுறை உணவுகள் வாடிக்கையாளர்களுக்கு நேரடியாக வீட்டிலேயோ, அலுவலகத்திலேயே தேவைப்பட்ட இடத்தில் டெலிவரி செய்யப்படும். இதற்காக வீட்டுமுறை சமையல் வல்லுநர்களால் மெனுவும் தயாரிக்கப்பட்டுவிட்டதாகவும் சொமேட்டோ தெரிவித்துள்ளது.

சொந்த வீட்டில் இருந்து பணி நிமித்தமாகவோ, கல்வி நிமித்தமாகவோ தொலைவில் இருப்பவர்கள், வீட்டு முறை உணவுகளுக்காக ஏங்குவோர், ஆரோக்கியமான உணவுகளை விரும்புவோர் போன்றவர்களை குறிவைத்து இந்த சேவை தொடங்கப்பட்டுள்ளது. அதுவும் 89 ரூபாயில் இருந்து வீட்டு முறை உணவுகளின் விலை தொடங்குவதாக சொமேட்டோ தெரிவித்துள்ளது.

இன்று பங்கு வர்த்தகத்தில் சொமேட்டோ பங்கு விலை 5% மேல் உயர்ந்துள்ளது குறிப்பிடத்தக்கது.