நெருங்கும் தீபாவளி: கார் விற்பனை உயர்வு!

இந்த ஆண்டின் தொடக்கம் முதலே இந்திய ஆட்டோமொபைல் துறையில் விற்பனை மந்தமாகவே இருந்து வருகிறது. கொரோனா பாதிப்பால் மக்களிடையே நிதி நெருக்கடி ஏற்பட்டதாலும், ஊரடங்கு கட்டுப்பாடுகளாலும் வாகன விற்பனை பெரும் வீழ்ச்சியைச் சந்தித்தது. ஊரடங்கு தளர்த்தப்பட்டு இயல்பு நிலை திரும்பி வருவதால் மக்களிடையே நுகர்வுத் தேவையும் செலவுகளும் அதிகரித்துள்ளன. அதுவும் பண்டிகைக் காலம் நெருங்கியுள்ளதால் வாகன விற்பனையில் சிறப்பு சலுகைகள் அறிவிக்கப்பட்டு வருவதோடு, வங்கிகளும் குறைந்த வட்டியில் வாகனக் கடன்களும் வழங்குகின்றன. இதனால் கார் விற்பனையும் இதர வாகனங்கள் விற்பனையும் கணிசமாக உயர்ந்துள்ளது.

இந்திய ஆட்டோமொபைல் உற்பத்தியாளர்கள் கூட்டமைப்பு வெளியிட்டுள்ள அறிக்கையின்படி, 2020 செப்டம்பர் மாதத்தில் மொத்தம் 2.7 லட்சம் பயணிகள் வாகனங்கள் விற்பனை செய்யப்பட்டுள்ளன. 2019ஆம் ஆண்டின் இதே காலத்தில் மொத்தம் 2.1 லட்சம் வாகனங்கள் மட்டுமே விற்பனை செய்யப்பட்டிருந்தன. இது 26 சதவீத வளர்ச்சியாகும். கார் விற்பனையைப் பொறுத்தவரையில் 2019 செப்டம்பரில் 1.3 லட்சம் கார்கள் விற்பனை செய்யப்பட்டன. 2020 செப்டம்பரில் இந்த எண்ணிக்கை 29 சதவீத வளர்ச்சியுடன் 1.6 லட்சமாக உயர்ந்துள்ளது.

ESIC: வேலை போனவர்களுக்கு ஜூன் வரை சம்பளம்!

2019 செப்டம்பரில் 10,300 வேன்களும், 10.4 லட்சம் மோட்டார் சைக்கிள்களும், 5.55 லட்சம் ஸ்கூட்டர்களும் விற்பனை செய்யப்பட்டன. 2020 செப்டம்பரில் இந்த எண்ணிக்கை முறையே 11,400 ஆகவும், 12.2 லட்சமாகவும், 5.56 லட்சமாகவும் உயர்ந்துள்ளது. மூன்று சக்கர வாகனங்கள் விற்பனையில் மட்டும் இந்த செப்டம்பர் மாதத்தில் 72 சதவீத வீழ்ச்சி ஏற்பட்டுள்ளது. ஜூலை - செப்டம்பர் காலாண்டில் பயணிகள் வாகன விற்பனை 17 சதவீதம் உயர்ந்து 7.3 லட்சமாக இருக்கிறது. 2019ஆம் ஆண்டின் இதே காலத்தில் மொத்தம் 6.2 லட்சம் வாகனங்கள் மட்டுமே விற்பனை செய்யப்பட்டிருந்தன.