Digital Currency: டிஜிட்டல் கரன்சி ஒரு அழகான ஆபத்து..பொடி வைத்துப் பேசும் நிதியமைச்சர்!!

இந்தியாவின் சொந்த டிஜிட்டல் கரன்சியான டிஜிட்டல் ரூபாய் இந்த நிதியாண்டின் இறுதிக்குள் ரிசர்வ் வங்கியால் வெளியிடப்படும் என மத்திய பட்ஜெட் தாக்கலில் நிதியமைச்சர் நிர்மலா சீதாராமன் அறிவித்தார்.

அதனைத் தொடர்ந்து டிஜிட்டல் கரன்சி குறித்து பல்வேறு கருத்துக்களையும் விவாதங்களையும் இந்திய ரிசர்வ் வங்கியின் கவர்னரான சக்தி காந்ததாஸ் உட்படப் பலரும் அதற்கு மறைமுக எதிர்ப்புக்களையே காட்டி வருகின்றனர்.

ஆனால் நம் அரசு யோசித்துக் கொண்டிருக்கும் அதே நேரத்தில் பொருளாதாரத்தில் பின் தங்கிய நாடான மத்திய ஆப்பிரிக்கக் குடியரசு சென்ற வாரம் பிட்காயினை அந்நாட்டின் சட்டப்பூர்வ நாணயமாகவே அறிவித்துள்ளது.

பல்வேறு நிகழ்ச்சிகளிலும் நிதியமைச்சரிடம் வைக்கப்படும் முக்கிய கேள்விகளில் கிரிப்டோ கரன்சி மசோதா மற்றும் டிஜிட்டல் கரன்சி குறித்த கேள்விகள் தவறாது இடம் பெற்று வருகிறது.

அதற்கு அவர்களுக்கு கிடைக்கும் பெரும்பாலான பதிலானது இருக்கு ஆனா இல்லை என்பது போலவே இருக்கும். இதற்கிடையில் மே 8 அன்று நேஷனல் செக்யூரிட்டீஸ் டெப்பாசிட்டரி லிமிடெட் நிறுவனத்தின் கூட்டத்தில் கலந்து கொண்ட நிதியமைச்சரிடம் டிஜிட்டல் கரன்சி குறித்த கேள்வி எழுப்பப்பட்டது.

அதற்கு நிதியமைச்சர் “டிஜிட்டல் கரன்சிக்கு பின் இருக்கும் பிளாக்செயின் தொழில்நுட்பத்தில் ஒரு பகுதி மட்டும் இயல்பான ஆபத்துடன் இருக்கும் எனக் கூறியுள்ளார்.

தொடர்ந்து பேசிய அவர் பிளாக்செயின் என்றும் அழைக்கப்படும் விநியோகிக்கப்பட்ட லெட்ஜர் தொழில்நுட்பத்தை (Distributed Ledger Technology (DLT) பயன்படுத்துவது "முற்றிலும் இன்றியமையாதது" என்றும் மேலும் அரசாங்கமும் அதைப் பயன்படுத்துவதை ஆதரிக்கிறது என்றும் கூறி நிதியமைச்சர் தெளிவுபடுத்தியுள்ளார்.

மேலும் பெயர் தெரியாத டிஜிட்டல் கரன்சி பின் இருக்கும் பிளாக்செயின் தொழில்நுட்பம் ஒரு நபராக அல்லது ரோபோவாகக் கூட இருக்கலாம் ஆனால் இந்த பெயர் தெரியாத தொழில்நுட்பத்தினால் ஏற்படும் எதிர்கால சவால்களைச் சந்திக்க நாம் முற்றிலும் தயாராக இருக்க வேண்டும் எனக் கூறியுள்ளார்.