அரசின் கடைக்கண் பார்வைக்காக காத்திருக்கும் கிரிப்டோ நிறுவனங்கள்!!

பாலிகான் பிளாக்செயின் நிறுவனத்தின் இணை நிறுவனர் சந்தீப் நெயில்வால் இந்தியாவில் கிரிப்டோ தொழில்துறையை கண்காணிக்கவும் வடிவமைக்கவும் அர்ப்பணிக்கப்பட்ட ஒரு ஒழுங்குமுறை சட்டம் மற்றும் அமைப்பை இந்தியா அரசு நிறுவ வேண்டும் என்று கூறியுள்ளார்.

இந்தியாவில் உள்ள கிரிப்டோ சுற்றுச்சூழல் அமைப்பைக் கண்காணித்து வடிவமைக்க இந்திய ரிசர்வ் வங்கி (ஆர்பிஐ), ஜிஎஸ்டி கவுன்சில் மற்றும் மத்திய நிதி அமைச்சகத்தின் பிரதிநிதிகள் புதிதாக உருவாக்கப்பட்ட அமைப்பின் ஒரு பகுதியாக இருக்க வேண்டும் எனவும் சந்தீப் கூறியுள்ளார்.

இந்தியாவில் தற்சமயம் வெப்3, பிளாக்செயின் தொழில்நுட்பம் மற்றும் NFT, மெட்டாவெர்ஸ் மற்றும் கிரிப்டோகரன்சி வர்த்தகமானது வளர்ந்து வரும் நிலையில் நிதியமைச்சர் நிர்மலா சீதாராமன் தலைமையிலான குழு கிரிப்டோகரன்சி சட்டங்கள் மற்றும் வரிகள் குறித்து மறு ஆலோசனை செய்ய வேண்டும் எனவும் கோரிக்கை வைத்துள்ளார்.

இந்திய நிதியமைச்சகத்தின் புது குழுவானது நாட்டில் கிரிப்டோ நிறுவனங்கள் செயல்படுவதற்கான ஒரு நல்ல சூழலை உருவாக்கித் தரவேண்டும் எனவும், கிரிப்டோவை கிரிப்டோ துறையில் ஈடுபடுவதற்கு தேவையான அனைத்து தெளிவையும் வழங்க முடியும் என்று அவற்றை புறக்கணிக்க வேண்டாம் எனவும் காயிண்டெஸ்க் தளத்திற்கு அளித்த பேட்டி ஒன்றில் சந்தீப் இவ்வாறு கூறியுள்ளார்.

இதற்கிடையில், G20 பொருளாதாரங்களின் கட்டுப்பாட்டாளர்கள் கூட்டத்தில் மத்திய வங்கிகள் மற்றும் நிதி அமைச்சக அதிகாரிகளைக் குழுவாகக் கொண்ட நிதி நிலைத்தன்மை வாரியம், கிரிப்டோகரன்சி சொத்துக்களில் என்ன செய்ய வேண்டும் என்பது குறித்து ஆலோசித்தும் வருகின்றனர்.

குறிப்பாக பொருளாதார ஒத்துழைப்பு மற்றும் மேம்பாட்டு அமைப்பு (The Organisation for Economic Co-operation and Development - OECD) சர்வதேச அளவில் கிரிப்டோ தொடர்பான தரவுகளை ஒருவருக்கொருவர் எவ்வாறு பகிர்ந்து கொள்வது என்பது குறித்தும் அவற்றிக்கான ஒழுங்குமுறை சட்டம் குறித்தும் உலக வரி நிறுவனங்களுக்கு அறிவுறுத்தும் வரைவு விதிகளை உருவாக்கியுள்ளது.