கிரிப்டோ கரன்சிக்கு தடையா? பயந்தா வாழ முடியுமா? ஆஸ்திரேலியா அதிரடி!

இப்போது உலகின் முக்கிய பேசுபொருளாக மாறியுள்ளது கிரிப்டோ கரன்சி. பல்வேறு நாடுகளும் கிரிப்டோ கரன்சி தொடர்பான தங்களுடைய பலதரப்பட்ட கருத்துகளை அன்றாடம் வெளியிட்ட வண்ணம் உள்ளன. பல்வேறு தடைகள் மற்றும் எதிர்ப்புகளையும் மீறி கிரிப்டோ கரன்சி சில நாடுகளில் மாஸ் காட்டி வருவதையும் யாராலும் மறுக்க முடியாது.

சீனாவின் தடையில் ஆரம்பித்து, எல் சால்வடாரின் அரவணைப்பு, இந்தியாவின் எதிர்ப்புகளுக்கும் மத்தியில் பலதரப்பட்ட மக்களிடையே வரவேற்பைப் பெற்றுத்தான் வருகிறது. மக்கள் மத்தியில் கிரிப்டோ கரன்சி எந்த அளவுக்கு வரவேற்பைப் பெற்றுள்ளதோ அந்த அளவுக்கு எதிர்ப்புகளையும் கொண்டுள்ளது. ஏனெனில் அதற்கு நிலையான சட்ட திட்டங்கள் இல்லை. அதன் மூலம் ஏற்படும் இழப்புக்கு யாரும் உத்தரவாதம் தருவதும் இல்லை.

இந்த மாதிரியான சூழ்நிலையில் ஆஸ்திரேலியாவின் டிஜிட்டல் பொருளாதாரத்தின் தலைவர் ஜேன் ஹியூம் சிட்னியில் நடைபெற்ற ஆஸ்திரேலிய நிதி மதிப்பாய்வு மற்றும் சூப்பர் அண்ட் வெல்த் எனும் உச்சி மாநாட்டில் கிரிப்டோ கரன்சி குறித்த கேள்விக்கு “கிரிப்டோ கரன்சியைக் கண்டு பயப்படத் தேவையில்லை. மாறாக எச்சரிக்கையாக இருந்தாலே போதுமானது” என அதிரடியாகக் கூறியுள்ளார்.

மேலும் பேசிய அவர், “பிளாக்செயின் தொழில்நுட்பம் குறித்த பல புதுமையான ஐடியாக்களை நாம் வரவேற்று அதனுடன் எதிர்காலத்தை நோக்கி சிறந்த முறையில் பயணிக்க வேண்டுமே தவிர புதிய கரன்சிகள் மற்றும் தொழில்நுட்பங்களைக் கண்டு பயந்து அவற்றை ஒதுக்குவது வருங்காலத்திற்கு நாம் செய்யும் தீங்காகும். தகவல் தொழில்நுட்பங்கள் மற்றும் விஞ்ஞானம் அதிவேகமாக வளர்ந்து வரும் இந்த நூற்றாண்டில் டிஜிட்டல் கரன்சியை கண்டு ஆஸ்திரேலிய நாடு பயப்படுவது அர்த்தமற்றது” என்றார்.

கிரிப்டோகரன்சிக்கு இந்தியா தடை.. மோடி அரசின் திட்டம்!
இந்த புதிய கரன்சிகளை ஏற்று அதற்கான பாதுகாப்பு வழிமுறைகளை கண்டறிந்து கவனமாக செயல்பட்டாலே தவறுகளிலிருந்து நாம் தப்பிக்கலாம் எனவும் அவர் ஆலோசனை தெரிவித்துள்ளார். இது மாதிரியான புதிய தொழில்நுட்பங்கள் மற்றும் கரன்சிகளைப் பற்றிய புரிதல்களே போதுமானது எனவும் பல்வேறு வல்லுநர்கள் தொடர்ந்து கூறிவருகின்றனர்.