Patanjali share: கிடுகிடு சரிவில் பதஞ்சலி ஃபுட்ஸ் பங்கு.. இதுதான் காரணம்!

இந்திய பங்குச் சந்தை முதலீட்டாளர்கள் வட்டாரத்தில் கடந்த இரண்டு வாரங்களாக அதானி விவகாரம் பெரும் பரபரப்பை ஏற்படுத்தியுள்ளது. அதானி குழுமம் கணக்கு மோசடி உள்ளிட்ட பல்வேறு மோசடிகளில் ஈடுபட்டுள்ளதாக அமெரிக்காவை சேர்ந்த ஹிண்டென்பர்க் நிறுவனம் ஆய்வறிக்கையை வெளியிட்டுள்ளது.

இதனால், அதானி பங்குகள் கடும் வீழ்ச்சியை சந்தித்துள்ளன. மேலும், உலக பணக்காரர்கள் பட்டியலில் 3ஆம் இடத்தில் இருந்த அதானி குழுமத் தலைவர் 21ஆம் இடத்துக்கு பின் தள்ளப்பட்டார். மேலும், அதானி குழுமத்தின் கடன் பத்திரங்களின் மதிப்பும் சரிந்துள்ளது.

இதெல்லாம் ஒரு பக்கம் பங்குச் சந்தையில் பரபரப்பை ஏற்படுத்தி வரும் நிலையில், யோகா சாமியார் பாபா ராம்தேவுக்கு சொந்தமான பதஞ்சலி ஃபுட்ஸ் நிறுவனத்தின் பங்கு கடந்த சில தினங்களில் மிக கடுமையாக சரிந்துள்ளது. ஜனவரி 25ஆம் தேதி முதல் பதஞ்சலி ஃபுட்ஸ் (Patanjali Foods) பங்கு 28% சரிந்துள்ளது.

பதஞ்சலி ஃபுட்ஸ் நிறுவனம் டிசம்பர் காலாண்டுக்கான வருமான முடிவுகளை வெளியிட்ட பின் அதன் பங்கு வ்9இலை தொடர்ந்து சரிந்து வருகிறது. ஏனெனில், முதலீட்டாளர்களின் எதிர்பார்ப்பை விட பதஞ்சலி ஃபுட்ஸ் நிறுவனத்தின் வருமானம் குறைந்துள்ளது.

டிசம்பர் காலாண்டில் பதஞ்சலி ஃபுட்ஸ் நிறுவனத்தின் லாபம் 15% அதிகரித்து 269 கோடி ரூபாயாக உயர்ந்துள்ளது. மேலும் பதஞ்சலி ஃபுட்ஸ் நிறுவனத்தின் வருவாய் 26% அதிகரித்து 7929 கோடி ரூபாயாக உயர்ந்துள்ளது. ஆனால், இது எதிர்பார்ப்பை விட குறைவான வருமானமாகும்.

எனவே, பதஞ்சலி பங்கு கடந்த சில தினங்களாக சரிந்து வருகிறது. கடந்த செப்டம்பர் மாதம் பதஞ்சலி பங்கு 1495 ரூபாயை தொட்டது. அதில் இருந்து 40% மேல் அதன் விலை சரிந்துவிட்டது. ஜனவரி 25ஆம் தேதிக்கு பின் மட்டும் பதஞ்சலி ஃபுட்ஸ் பங்கு 28% சரிந்துள்ளது.

இதுமட்டுமல்லாமல், ஒரு நிறுவனத்தில் அதன் புரமோட்டருக்கு 75% வரை மட்டுமே பங்கு இருக்க வேண்டும் என்பது விதிமுறை. ஆனால், பதஞ்சலியில் புரமோட்டருக்கு 80% மேல் பங்கு உள்ளது. பங்குகளை 75% ஆக குறைப்பதற்கான காலக்கெடுவையும் பதஞ்சலி தாண்டிவிட்டது.

இந்நிலையில், ஓரிரு மாதங்களில் பதஞ்சலி தனது கூடுதல் பங்குகளை விற்கப்போவதாக தெரிவித்துள்ளது. இதன் காரணமாகவும் பதஞ்சலி ஃபுட்ஸ் பங்கு விலை சரிந்துள்ளது.