Zomato Share: வெளியேறும் சீனியர்கள்.. சொமேட்டோ பங்கு கடும் சரிவு!

உணவு டெலிவரி நிறுவனமான சொமேட்டோ (Zomato) பங்கு விலை அண்மைக்காலமாக சரிந்து வருகிறது. இந்நிலையில், சொமேட்டோ நிறுவனத்தின் தலைமை தொழில்நுட்ப அதிகாரியான குன்ஜன் பட்டிடார் தனது பொறுப்பை நேற்று ராஜினாமா செய்துவிட்டார்.

இதைத்தொடர்ந்து, இன்று பங்கு வர்த்தகத்தின் போது சொமேட்டோ பங்கு விலை கிட்டத்தட்ட 5% சரிந்துவிட்டது. இன்று சொமேட்டோ பங்கு விலை அதிகபட்சமாக 57.30 ரூபாய் வரை சரிந்துவிட்டது. வர்த்தகமான பங்குகளின் அளவில், தேசிய பங்குச் சந்தையில் 2.20 கோடி பங்குகளும், மும்பை பங்குச் சந்தையில் 14.86 லட்சம் பங்குகளும் விற்பனையாகியுள்ளன.

யார் இந்த குன்ஜன் பட்டிடார்?

சொமேட்டோ நிறுவனம் தொடங்கப்பட்டபோது அதில் இணைந்த முதல் சில ஊழியர்களில் குன்ஜன் பட்டிடாரும் ஒருவர். இவர் சொமேட்டோ நிறுவனத்தின் முக்கியமான தொழில்நுட்பங்களை கட்டமைப்பதில் முக்கிய பொறுப்பு வகித்தவர்.

உணவு பார்சல், டெலிவரிக்கும் ஜிஎஸ்டி உண்டு.. வெளியானது உத்தரவு!
குன்ஜன் பட்டிடார் ராஜினாமா குறித்து சொமேட்டோ பங்குச் சந்தையில் தாக்கல் செய்துள்ள அறிக்கையில், கடந்த 10 ஆண்டுகளுக்கும் மேலாக சொமேட்டோ நிறுவனத்தின் தொழில்நுட்பத்தை மெல்ல மெல்ல வளர்த்தெடுத்தவர் குன்ஜன் பட்டிடார் என தெரிவித்துள்ளது. சொமேட்டோவை கட்டமைத்ததில் குன்ஜன் பட்டிடாரின் பங்கு மதிப்புமிக்கது எனவும் சொமேட்டோ தெரிவித்துள்ளது.

எனினும், குன்ஜன் பட்டிடார் ஏன் தனது பொறுப்பை ராஜினாமா செய்தார் என்பது பற்றி சொமேட்டோ தகவல் தெரிவிக்கவில்லை.

வெளியேறும் சீனியர்கள்

ஏற்கெனவே சொமேட்டோ நிறுவனத்தில் இருந்து முக்கியஸ்தர்கள் வெளியேறி வருவது குறிப்பிடத்தக்கது. சொமேட்டோ நிறுவனத்தின் இணை நிறுவனரான மோகித் குப்தா கடந்த நவம்பர் மாதம் ராஜினாமா செய்தார்.

இதுபோக சொமேட்டோ நிறுவனத்தின் துணை நிதி நிதிகாரியான நிதின் சவராவும், சர்வதேச வளர்ச்சி துறையின் துணை தலைவர் சித்தார் ஜவஹரும் ஏற்கெனவே ராஜினாமா செய்துவிட்டனர். இந்த வரிசையில் இப்போது இன்னொரு சீனியரும் ராஜினாமா செய்துள்ளது பங்குதாரர்கள் மத்தியில் பரபரப்பை ஏற்படுத்தியுள்ளது.

சொமேட்டோ பங்கு

சொமேட்டோ நிறுவனத்தின் பங்கு விலை அண்மைக்காலமாக 55 ரூபாய் முதல் 63 ரூபாய் வரை ஏறி இறங்கி வருகிறது. அடுத்து சொமேட்டோவின் வருமான விவரங்கள் வெளியானதும் அடுத்த நகர்வை எதிர்பார்க்கலாம் என வல்லுநர்கள் கூறுகின்றனர்.