IT stocks: ஐடி பங்குகள் ஜாக்கிரதையா வாங்கணுமாம்.. ஜெஃப்ரீஸ் வார்னிங்!

ஐடி நிறுவனங்களின் வளர்ச்சி வேகம் குறையக்கூடும் எனவும், இந்திய ஐடி நிறுவனங்கள் கடினமான சூழலை எதிர்நோக்கியுள்ளதாகவும் சர்வதேச புரோக்கரேஜ் நிறுவனமான ஜெஃப்ரீஸ் (Jefferies) தெரிவித்துள்ளது.

டிசிஎஸ், இன்ஃபோசிஸ் உள்ளிட்ட ஐடி நிறுவனங்கள் டிசம்பர் காலாண்டுக்கான வருமான முடிவுகளை வெளியிட்டுள்ளன. ஐடி நிறுவனங்கள் லாபம் ஈட்டி இருந்தாலும் கூட, வரும் மாதங்கள் கடினமான சூழலை எதிர்கொள்ளக்கூடும் என ஜெஃப்ரீஸ் கருதுகிறது.

2023ஆம் ஆண்டில் உலக பொருளாதார மந்தநிலை ஏற்படக்கூடும் என்ற அச்சம் நிலவுவது இதற்கு ஒரு காரணமாக இருக்கலாம். தற்போதைய நிலையில், இன்ஃபோசிஸ் (Infosys) நிறுவனத்துக்கு மட்டுமே ஜெஃப்ரீஸ் நிறுவனம் BUY ரேட்டிங் கொடுத்துள்ளது. அதாவது, தற்போதைய சூழலில் ஐடி பங்குகளில் இன்ஃபோசிஸ் பங்கை மட்டுமே வாங்கும்படி ஜெஃப்ரீஸ் பரிந்துரைக்கிறது.

இந்தியாவின் ஏற்றுமதி 12% சரிவு.. இனி கஷ்ட காலம்தான்!
வரும் மாதங்களை பொறுத்தவரை, இந்திய ஐடி நிறுவனங்களின் ஒட்டுமொத்த வருவாய் வளர்ச்சி 2023ஆம் நிதியாண்டில் 14.6% இல் இருந்து 2024ஆம் நிடியாண்டில் 6.8% ஆக குறையும் என ஜெஃப்ரீஸ் எதிர்பார்க்கிறது. ஐடி நிறுவனங்களின் வளர்ச்சி எதிர்பார்ப்பு குறைவாகவே இருப்பதாக ஜெஃப்ரீஸ் கூறுகிறது.

மேலும், Niftyஐ விட Nifty IT தற்போது 17% பிரீமியத்தில் வர்த்தகமாகி வருகிறது. பல்வேறு ஐடி பங்குகளின் மதிப்பீடும் (valuation) மிக அதிகமாக இருக்கிறது. எனவே, ஐடி துறை மற்றும் ஐடி பங்குகளில் ஜாக்கிரதையான நிலைப்பாட்டையே ஜெஃப்ரீஸ் எடுத்துள்ளது.

டிசம்பர் காலாண்டில் டிசிஎஸ் (TCS) நிறுவனத்தின் லாபம் 11% அதிகரித்து 10,846 கோடி ரூபாயாக உயர்ந்துள்ளது. இன்ஃபோசிஸ் (Infosys) நிறுவனத்தின் லாபம் 13% அதிகரித்து 6,586 கோடி ரூபாயாக உயர்ந்துள்ளது. எச்சிஎல் (HCL) நிறுவனத்தின் லாபம் 17% அதிகரித்து 4,096 கோடி ரூபாயாக உயர்ந்துள்ளது. விப்ரோ (Wipro) நிறுவனத்தின் லாபம் 2.8% அதிகரித்து 3,053 கோடி ரூபாயாக உயர்ந்துள்ளது.