இன்ஃபோசிஸ் பங்கு கடும் சரிவு.. ஐடி நிறுவனங்களுக்கு கெட்ட காலமா?

நேற்று இன்ஃபோசிஸ் பங்கு (Infosys share) 3.14% சரிந்து 1383.40 ரூபாயாக முடிவடைந்துள்ளது. இதுமட்டுமல்லாமல் நியூ யார்க் பங்கு சந்தையில் இன்ஃபோசிஸ் பங்கு நேற்று ஒரே நாளில் 10% சரிந்துள்ளது.

இன்ஃபோசிஸ் நிறுவனத்தின் காலாண்டு முடிவுகள் வெளியான நிலையில், இன்ஃபோசிஸ் வருமானம் மார்க்கெட் எதிர்பார்ப்புக்கு ஏற்ப இல்லை என்பதால் பங்கு விலை சரிவடைந்துள்ளது. கடந்த மார்ச் காலாண்டில் இன்ஃபோசிஸ் நிறுவனத்தின் லாபம் 7.8% உயர்ந்துள்ளது. மேலும் வருவாய் 16% உயர்ந்துள்ளது.

மேலும், நோமுரா, சிட்டி போன்ற சர்வதேச நிறுவனங்கள் இன்ஃபோசிஸ் பங்கிற்கான ரேட்டிங்கை குறைத்துள்ளன. இதுவும் இன்ஃபோசிஸ் பங்கு விலை சரிந்ததற்கு முக்கிய காரணமாக அமைந்துள்ளது.

நோமுரா (Nomura) நிறுவனம் இன்ஃபோசிஸ் பங்கிற்கான டார்கெட் விலையை 1660 ரூபாயில் இருந்து 1290 ரூபாயாக குறைத்துள்ளது. மேலும் இன்ஃபோசிஸ் பங்குக்கு 'Buy' என வைத்திருந்த ரேட்டிங்கை 'Neutral' என குறைத்துள்ளது.

இதுமட்டுமல்லாமல், சிட்டி (Citi) நிறுவனம் இன்ஃபோசிஸ் பங்கிற்கான டார்கெட் விலையை 1675 ரூபாயில் இருந்து 1400 ரூபாயாக குறைத்துள்ளது. மேலும் ரேட்டிங்கை 'Neutral' என மாற்றியுள்ளது.

எதிர்பார்ப்புக்கு ஏற்ற லாபம் இல்லை, சர்வதேச நிறுவனங்களின் ரேட்டிங் குறைப்பு போன்ற காரணங்களால் இன்ஃபோசிஸ் பங்கு விலை சரிந்தாலும் கூட, பொருளாதார மந்தநிலை ஏற்படும் என்ற அச்சமே பங்கு விலை சரிவுக்கு முக்கிய காரணமாக உள்ளது. லாபம் எதிர்பார்ப்புக்கு ஏற்ப இல்லாதது பொருளாதார மந்தநிலைக்கான அறிகுறியாகவே பார்க்கப்படுகிறது.

இதுமட்டுமல்லாமல், இன்ஃபோசிஸ் நிறுவனத்தின் போட்டி நிறுவனமான டிசிஎஸ் (TCS) லாபமும் எதிர்பார்ப்புக்கு ஏற்ப இல்லை என்பதால் கடந்த இரு தினங்களாக டிசிஎஸ் பங்கு விலை சரிந்து வருவது குறிப்பிடத்தக்கது. தற்போது டிசிஎஸ் பங்கு விலை 3192 ரூபாயாக உள்ளது.