ITC share: இப்போதும் சூப்பரா இருக்கு.. ஐடிசி பங்கை ஏன் வாங்க வேண்டும்?

கடந்த வெள்ளிக் கிழமை பங்கு வர்த்தகத்தில் ஐடிசி பங்கு (ITC share) 3% உயர்ந்து 428 ரூபாய் என்ற புதிய உச்சத்தை தொட்டுள்ளது.

கடந்த சில வாரங்களாகவே பங்கு சந்தை ஏற்ற இறக்கங்களுடன் நிலையில்லாமல் இருந்து வருகிறது. ஆனால், ஐடிசி பங்கு மட்டும் எந்தவொரு சலனமும் இல்லாமல் தொடர்ந்து உயர்ந்துகொண்டே வருகிறது. வெறும் பங்கு விலை ஏற்றம் மட்டுமல்லாமல் புதிய உச்சத்தையும் ஐடிசி தொட்டுள்ளது.

ஐடிசி நிறுவனத்தின் பிரதான தொழில் சிகரெட். இதுமட்டுமல்லாமல் ஹோட்டல், FMCG, ஐடி, பேக்கேஜிங், விவசாயம் என பல்வேறு தொழில்களையும் ஐடிசி நிறுவனம் செய்து வருகிறது.

நடப்பு ஆண்டில் மட்டும் இதுவரை ஐடிசி பங்கு விலை 28% உயர்ந்துள்ளது. கடந்த ஆண்டில் ஐடிசி பங்கு விலை 64% உயர்ந்துள்ளது. தொடர் வளர்ச்சியால் ஐடிசி பங்கு சிறு முதலீட்டாளர்களை வெகுவாக ஈர்த்துள்ளது.

தற்போது இந்தியாவில் சந்தை மதிப்பு அடிப்படையில் 6ஆவது மிகப்பெரிய நிறுவனமாக ஐடிசி உள்ளது. இன்ஃபோசிஸ், எச்டிஎஃப்சி, எஸ்பிஐ, ஏர்டெல், அதானி எண்டர்பிரைசஸ், எல்ஐசி ஆகிய நிறுவனங்களை சந்தை மதிப்பில் முந்தியுள்ளது ஐடிசி.

இப்போதும் கூட பெரும்பாலான புரோக்கரேஜ் நிறுவனங்கள் ஐடிசி பங்குக்கு ‘BUY' ரேட்டிங் கொடுத்துள்ளன. தற்போதைய சூழலில் ஐடிசி நிறுவனத்தின் ஹோட்டல், பேப்பர் போர்டு, விவசாயம் உள்ளிட்ட தொழில்கள் முன்னேறும் என எதிர்பார்க்கப்படுகிறது.

இதுமட்டுமல்லாமல் ஐடிசி நிறுவனம் தனது பங்குதாரர்களுக்கு தொடர்ந்து டிவிடெண்ட் செலுத்தி வருகிறது. கடந்த ஒரு ஆண்டில் மட்டும் ஐடிசி நிறுவனம் தனது பங்குதாரர்களுக்கு ஒரு பங்குக்கு 12.25 ரூபாய் டிவிடெண்ட் செலுத்தியுள்ளது. இதனால் ஐடிசி பங்கு மீது முதலீட்டாளர்களின் கவனம் திரும்பியுள்ளது.