தமிழக பட்ஜெட் 2020: பொருளாதார வளர்ச்சி எப்படி இருக்கும்?

நடப்பு நிதியாண்டில் தமிழகத்தின் பொருளாதார வளர்ச்சி 7.27 சதவீதமாக இருக்கும் என்று நிதியமைச்சர் பன்னீர் செல்வம் தெரிவித்துள்ளார்.

தமிழகத்தின் 2020 பட்ஜெட் நிதியமைச்சரும் துணை முதல்வருமான ஒ.பன்னீர் செல்வத்தால் தாக்கல் செய்யப்பட்டு வருகிறது. அதில் பல்வேறு துறைகளுக்கான நிதி ஒதுக்கீடு, அரசின் சாதனைகள், எதிர்காலத் திட்டங்கள், இலக்குகள் உள்ளிட்ட பல்வேறு அம்சங்கள் குறித்து அறிவிப்புகள் வெளியாகி வருகின்றன. இந்த நிதியாண்டில் தமிழகத்தின் பொருளாதார வளர்ச்சி 7.27 சதவீதமாக இருக்கும் என்று பட்ஜெட்டில் மதிப்பிடப்பட்டுள்ளது. இந்தியா தற்போது மிக மந்தமான பொருளாதார வளர்ச்சியைக் கொண்டிருந்தாலும் தமிழகம் உயர் பொருளாதார வளர்ச்சியைப் பெற்றுள்ளதாகப் பன்னீர் செல்வம் கூறினார். 2016-17ஆம் ஆண்டில் 7.15 சதவீத வளர்ச்சியையும், 2017-18ஆம் ஆண்டில் 7.68 சதவீத வளர்ச்சியையும், 2018-19ஆம் ஆண்டில் 8.17 சதவீத வளர்ச்சியையும் தமிழகம் கொண்டிருந்தது.

வரிப் பங்கீட்டைப் பொறுத்தவரையில், 2019-20ஆம் ஆண்டு பட்ஜெட் மதிப்பீட்டில் ரூ.33,978.47 கோடியாக இருந்த மத்திய வரியின் மாநில அரசிற்கான பங்கு, 2019-20ஆம் ஆண்டு திருத்த மதிப்பீட்டில் ரூ.26,392.40 கோடியாகக் குறைக்கப்பட்டிருப்பதால் தமிழகம் பெரும் பின்னடைவை சந்தித்துள்ளதாக பட்ஜெட் அறிக்கையில் தெரிவிக்கப்பட்டுள்ளது. மத்திய அரசிடமிருந்து தமிழகம் பங்காகப் பெறும் மத்திய வரிகளின் நிதிப் பகிர்வு 2019-20ஆம் ஆண்டிற்கான திருத்த மதிப்பீடுகளில் வரலாறு காணாத வீழ்ச்சியைக் கண்டுள்ளது.

தமிழ்நாடு பட்ஜெட் 2020: நடப்பு நிதியாண்டில் பெரும் சரிவு ஏற்பட்டுள்ளது : நிதியமைச்சர் ஓ.பி.எஸ்

2017-18ஆம் ஆண்டு முதல் தமிழகத்திற்கு ரூ.4,073 கோடி ஜிஎஸ்டி நிலுவைத் தொகை உள்ளது. நடப்பு நிதியாண்டின் நிறைவுக்குள் இந்த பாக்கித் தொகை வழங்கப்படும் என நம்புவதாக பன்னீர் செல்வம் கூறினார். அடுத்த இரண்டு ஆண்டுகளுக்கு பெட்ரோலியப் பொருட்கள் மீதான விற்பனை வரி வளர்ச்சி விகிதம் குறிப்பிடத்தக்க அளவில் உயரும் எனவும் அவர் தெரிவித்தார்.

பட்ஜெட்டில் விவசாயத்துக்கு ஒதுக்கப்பட்ட திட்டங்கள் என்னென்ன தெரியுமா?

பட்ஜெட்டில் அறிவிக்கப்பட்டுள்ள அம்சங்கள், திட்டங்களால் தமிழகத்தின் பொருளாதார வளர்ச்சி மேம்படும் எனவும், அதனால் பலருக்கு வேலைவாய்ப்புகள் கிடைக்கும் என்று கூறி முடித்தார் பன்னீர் செல்வம்.