பள்ளிகளில் உள்கட்டமைப்பை மேம்படுத்த ரூ.352 கோடி ஒதுக்கீடு

சென்னை : தமிழகத்தில் உள்ள பள்ளிகளில் உள்கட்டமைப்பு வசதிகளை மேம்படுத்த ரூ.352 கோடி ஒதுக்கப்பட்டுள்ளதாக தமிழக நிதிதுறை அமைச்சர் ஜெயக்குமார் தெரிவித்துள்ளார்.


இன்று தமிழக சட்ட சபையில் பட்ஜெட்டை தாக்கல் செய்த தமிழக நிதி அமைச்சர் ஜெயக்குமார் , பள்ளிக்கல்வி துறை திட்டங்கள் குறித்து முக்கிய அறிவிப்பை வெளியிட்டார்.பள்ளிகளில் உள்கட்டமைப்பு வசதி குறித்து அவர் கூறும் போது, " வகுப்பறைகள், அறிவியல் ஆய்வுக் கூடங்கள், குடிநீர்வசதி, சுற்றுச்சுவர் மற்றும் சாய்வுதளங்கள், மாணவ, மாணவியருக்கான தனித்தனிக் கழிவறைகள் உள்ளிட்ட தேவையான உட்கட்டமைப்பு வசதிகளை பள்ளிகளில் ஏற்படுத்துவதற்கு அரசு சிறப்பு கவனம்செலுத்தி வருகிறது.


2016-2017 ஆம் ஆண்டில், இத்தகைய உட்கட்டமைப்பு வசதிகளை ஏற்படுத்த 440.98 கோடி ரூபாய் ஒதுக்கீடு செய்யப்பட்டுள்ளது. பள்ளிக் கழிவறைகளில் சுகாதாரத்தைப் பேணுவதற்காக உள்ளாட்சி அமைப்புகள் மூலம் 2016-2017 ஆம் ஆண்டில் 57.63 கோடி ரூபாய் பள்ளிகளுக்கு வழங்கப்பட்டுள்ளது.


இந்த முயற்சி 2017-2018 ஆம் ஆண்டிலும் தொடர்ந்து மேற்கொள்ளப்படும். நபார்டு வங்கியிடமிருந்து பெறப்படும் கடனுதவியையும் சேர்த்து பள்ளிகளின் உட்கட்டமைப்பு வசதிகளை மேம்படுத்த 2017-2018 ஆம் ஆண்டிற்கான வரவு-செலவுத் திட்ட மதிப்பீடுகளில் 352 கோடி ரூபாய் ஒதுக்கீடு செய்யப்பட்டுள்ளது. " என்று அவர் கூறினார்.
tn govt., sanction Rs .352 crore to improve infrastructure in schools