TANUVAS Admission 2022: கால்நடை மருத்துவ படிப்பு சேர்க்கைக்கு விண்ணப்பிக்க செப்., 26 கடைசி

சமீபத்தில்தான் பொது மருத்துவ இளநிலை படிப்பிற்கான நீட் தேர்வு முடிந்து அதற்கான தேர்வு முடிவுகளும் வெளியிடப்பட்டு கலந்தாய்வுக்காக மாணவர்கள் காத்திருக்கின்றனர்.

இந்நிலையில் பன்னிரண்டாம் வகுப்பு மதிப்பெண் அடிப்படையில் மாணவர் சேர்க்கை நடைபெறும் கால்நடை மருத்துவ படிப்புகளான BVSc & AH மற்றும் BTech ஆகிய இளநிலை படிப்புகளுக்கான விண்ணப்பங்கள் வெளியிடப்பட்டுள்ளன.

செப்டம்பர் 12 ஆம் தேதியில் இருந்து நடைபெற்று வரும் விண்ணப்பித்தலுக்கு 18 ஆம் தேதி வரை BVSc & AH படிப்பிற்கு 7825 மாணவர்களும், BTech படிப்பிற்கு 1510 மாணவர்களும் விண்ணப்பித்துள்ளதாக சேர்க்கை குழு சார்பில் வெளியிடப்பட்டுள்ள அறிவிப்பில் தெரிவிக்கப்பட்டுள்ளது.

மேலும் 12ஆம் தேதி துவங்கிய விண்ணப்பித்தல் நிகழ்வு 26 ஆம் தேதி மாலை 5 மணி வரை திறந்திருக்கும் என்று கூறியுள்ளனர். அரசு பள்ளி மாணவர்களுக்கு 7.5% இடஒதுக்கீடு இந்த ஆண்டும் வழங்கப்படும் என்று அறிக்கையில் குறிப்பிடப்பட்டுள்ளது.

கால்நடை மருத்துவம் மற்றும் கால்நடை பராமரிப்பு படிப்பான BVSc & AH பட்டபடிப்பிற்கு விண்ணப்பிக்கும் மாணவர்கள் இயற்பியல், வேதியல், உயிரியல் ஆகிய பாடங்கள் படித்திருக்க வேண்டும் என்றும்,

தொழிநுட்ப படிப்பான BTech பட்டபடிப்பிற்கு விண்ணப்பிக்கும் மாணவர்கள் கணிதம், இயற்பியல், வேதியல், உயிரியல் ஆகிய பாடங்கள் படித்திருக்க வேண்டும் என்று சேர்க்கைகுழு அந்த அறிக்கையில் தெரிவித்துள்ளது.

மாணவர்கள் பலக்லைக்கழகத்தின் அதிகாரபூர்வ இணையதளமான adm.tanuvas.ac.in சென்று இணையம் மூலமாக விண்ணப்பிக்கலாம்.

வெளிநாட்டு மாணவர்களுக்கு அக்டோபர் 14ஆம் தேதி மாலை 5 மணி வரை பல்கலைக்கழக இணையதளம் வாயிலாக விண்ணப்பிக்க வழிவகை செய்துள்ளனர்.

மேலும் விவரங்களுக்கு adm.tanuvas.ac.in என்ற பல்கலைக்கழக இணையதள முகவரியை பயன்படுத்தி பெற்றுக்கொள்ளலாம்.