TANCET நுழைவுத்தேர்வை அண்ணா பல்கலை. தான் நடத்தும்!

முதுநிலை இன்ஜினியரிங் படிப்புகளுக்கான டான்செட் தேர்வை அண்ணா பல்லைக்கழகம் தான் நடத்தும் என்று துணைவேந்தர் சூரப்பா தெரிவித்துள்ளார்.

முதுநிலை பொறியியல் படிப்பில் சேருவதற்கு ஒவ்வொரு ஆண்டும் டான்செட் (TANCET - TamilNadu Common Entrance Test) நுழைவுத்தேர்வு நடத்தப்பட்டு வந்தது. மாநிலம் முழுவதும் உள்ள அண்ணா பல்கலைக்கழகத்துக்கு உட்பட கல்லூரிகளில் சேருவதற்கு இந்த தேர்வில் தேர்ச்சி பெற வேண்டும். இதனை அண்ணா பல்கலைக்கழகம் நடத்தி வந்தது. ஆனால், இந்த வருடம் அண்ணா பல்கலைக்கழகத்தில் பயிற்றுவிக்கப்படும் படிப்புகளுக்கு மட்டும் AUCET தேர்வு நடைபெறும் என்று புதிய கொள்கை முறை கொண்டு வரப்பட்டது.

இதனால் மாநிலங்களில் உள்ள மற்ற கல்லூரிகளில் சேருவது எப்படி, இதுவரையில் நடத்தப்பட்டு வந்த டான்செட் தேர்வை யார் நடத்துவார்கள் என்பது மாணவர்கள் மத்தியில் குழப்பத்தை ஏற்படுத்தியது. இதனிடையே டான்செட் தேர்வை அண்ணா பல்கலைக்கழகமே நடத்துவதற்கு உயர்கல்வித்துறை பரிந்துரை செய்தது. இந்நிலையில் முதுநிலை இன்ஜினியரிங் படிப்புகளுக்கான டான்செட் தேர்வை அண்ணா பல்லைக்கழகம் தான் நடத்தும் என்று துணைவேந்தர் சூரப்பா தெரிவித்துள்ளார். பல்கலைக்கழகத்தில் இன்று நடைபெற்ற உயர்மட்ட ஆலோசனைக் கூட்டத்தில் இந்த முடிவு எடுக்கப்பட்டுள்ளது. விரைவில் டான்செட் தேர்வுக்கான அறிவிப்பு வெளியாகும் என்று எதிர்பார்க்கப்படுகிறது.